Thierry Henry: Suarez er fullkominn fyrir Barcelona

Thierry Henry, Meistaradeildarsérfræðingur Sky Sports, segir að Úrúgvæmaðurinn Luis Suarez sé framherjinn sem Barcelona hefur verið að leita að.

Þessi fyrrum framherji Liverpool skoraði tvö glæsileg mörk í 3-1 sigri Barcelona á Paris Saint-Germain í gær en þetta var fyrri leikur liðanna í átta liða úrslitum Meistaradeildarinnar.

„Hann er leikmaður númer 9 eins og ég vil sjá í þessu Barcelona-liði," sagði Theirry Henry í útsendingu Sky Sports.

„Hann er alltaf að bjóða sig og hann er alltaf að leita að möguleikanum á því að komast á bak við vörnina," sagði Thierry Henry.

Henry segir að koma Luis Suarez er ekki aðeins að skila mörkum frá Suarez heldur gefur Lionel Messi einnig meira pláss til þess að vinna með.

„Í mínu Barca-liðið þá vorum ég og Samuel Eto’o í þessu hlutverki. Við vorum alltaf að biðja um boltann og þess vegna gat Leo unnið á svæðinu milli varnar og miðju í hlutverki fölsku níunnar," sagði Henry.

Barcelona keypti Luis Suarez á 75 milljónir punda frá Liverpool síðasta sumar og hann er kominn á mikið flug eftir frekar rólega byrjun. Suarez hefur nú skorað 11 mörk í síðustu 11 leikjum þar af fjögur þeirra í síðustu tveimur útileikjum liðsins í Meistaradeildinni.

„Þeir eru aftur farnir að spila svona því þeir eru komnir með mann eins Luis Suarez. Hann gefur öðrum í liðinu tækifæri á því að spila betur. Þeir fóru til Leo úti hægra megin og til Neymar úti vinstra megin en núna eru þeir komnir með leikmann númer níu sem þeir höfðu ekki í langan tíma," sagði Henry.