Notendur geta birt myndskeið sín á Twitter

Notendur Twitter geta núna birt sín eigin myndskeið á samfélagsmiðlinum. Vonast stofnendur síðunnar til þess að þetta muni auka vinsældir hennar.

Á vef Wall Street Journal segir að hægt sé að birta allt að 30 sekúndna löng myndskeið. Myndskeiðin birtast ekki sjálfkrafa þegar smellt er á þau. En þegar notandinn ýtir á play-takkann birtist stór mynd og myndskeiðið byrjar að rúlla.

Wall Street Journal bendir á að Twitter hafi átt erfitt uppdráttar þangað til að notendum gafst möguleiki á því að birta ljósmyndir á vefnum. Það hafi aukið vinsældir hans og rennt enn einni stoðinni undir borgaralega blaðamennsku þar sem notendur gátu miðlað fréttum af stórum viðburðum.

Í fyrstu hönnuðu þriðju aðilar ljósmyndaforrit til þess að deila á Twitter, eins og Twitpic. Árið 2011 gaf Twitter svo út sitt eigið innbyggða ljósmyndaforrit. Sú þjónusta hefur sífellt verið að þróast.

Twitter hefur á liðnum árum tekið margvíslegum breytingum til þess að auka vinsældir vefjarins. Til dæmis hefur verið hægt að fella inn myndskeið á Twitter (e. embed) í mörg ár. Í fyrra byrjaði vefsíðan svo að þróa sig áfram í auglýsingum á myndskeiðum.