Bandarísk yfirvöld lögsækja Volkswagen

Bandarísk yfirvöld hafa lögsótt þýska bílarisann Volkswagen í tengslum við útblásturshneykslið sem upp kom í haust.

Forsvarsmenn Volkswagen viðurkenndu á síðasta ári að hafa komið fyrir sérstökum búnaði í 11 milljónum bíla sem dró úr útblæstri bílsins þegar verið var að mæla útblástur.

Hneykslið hefur haft talsverð áhrif á sölu á Volkswagen-bílum frá því að upp komst um svindlið og hefur fyrirtækið eyrnamerkt fleiri milljarða evra til að geta greitt mögulegar skaðabætur.

Í frétt BBC kemur fram að dómstóll í Detroit taki málið til meðferðar, en kæran var lögð fram fyrir hönd Umhverfismálastofnunar Bandaríkjanna (EPA).

Í kærunni er Volkswagen sakað um að hafa brotið gegn lögum með því að selja bíla ólíkum þeim sem hlotið höfðu samþykki af stofnuninni.