Messi getur komið sér og Ronaldo yfir 1.000 marka múrinn

Lionel Messi og Cristiano Ronaldo virðast skora mörk eins og að drekka vatn. Þeir slá hvert markametið á fætur öðru í öllum deildum og nú nálgast þeir einn áfanga saman. Sky Sports greinir frá.

Barcelona mætir Athletic Bilbao í kvöld í seinni leik liðanna í átta liða úrslitum spænska Konungsbikarsins, en skori Argentínumaðurinn verða hann og Ronaldo í heildina búnir að skora 1.000 mörk á ferlinum fyrir félagslið og landslið.

Messi er búinn að skora 481 mark, þar af 49 fyrir argentínska landsliðið, síðan hann skoraði sitt fyrsta fyrir Barcelona þegar hann kom inn á sem varamaður í 2-0 sigri á Albacete í maí 2005.

Cristiano Ronaldo er búinn að skora 518 mörk á sínum glæsta ferli, en það fyrsta skoraði hann fyrir Sporting í heimalandinu í október 2002. Hann setti síðan 118 fyrir Manchester United áður en hann gekk í raðir Real Madrid árið 2009.

Messi og Ronaldo, sem hafa samanlagt verið kosnir fótboltamenn ársins átta sinnum, berjast vanalega um öll einstaklingsverðlaun sem eru í boði en þennan áfanga geta þeir átt saman.

Mörk Messi og Ronaldo:

999: Heildarfjöldi marka þeirra tveggja á ferlinum í 1.384 leikjum

Lionel Messi:

Leikir/mörk fyrir Barcelona: 506/432

Leikir/mörk fyrir Argentínu: 105/49

Heildarfjöldi leikja/marka: 611/481

Cristiano Ronaldo:

Leikir/mörk fyrir Sporting: 31/5

Leikir/ fyrir Manchester United: 292/118

Leikir/mörk fyrir Real Madrid: 327/340

Leikir/mörk fyrir Portúgal: 123/55

Heildarfjöldi leikja/marka: 773/518