Barcelona vann í Bilbao án Messi og Suárez

Barcelona vann Athletic Bilbao, 2-1, í fyrri leik liðanna í átta liða úrslitum spænska Konungsbikarsins í kvöld.

Luis Enrique, þjálfari Barcelona, hvíldi Messi og Suárez en hafði Neymar í liðinu og auðvitað skoraði Brassinn. Messi og Suárez voru tæpir fyrir leikinn vegna meiðsla.

Ungstirnið Munir El Haddadi kom Barcelona yfir á 18. mínútu og sjö mínútum síðar skoraði Neymar, 2-0.

Aritz Aduriz minnkaði muninn, 2-1, fyrir baskana einni mínútu fyrir leikslok, en liðin mætast aftur á Nývangi eftir viku.

Atlético Madrid, toppliðið í spænsku 1. deildinni, gerði markalaust jafntefli á útivelli gegn Celta Vigo en þau mætast aftur í höfuðborginni eftir viku.