Sagan skrifuð í Saint-Étienne

„Ég er gríðarlega stoltur af að hafa skorað þetta mark. Ég mun minnast þess alla ævi,“ sagði kampakátur Birkir Bjarnason, leikmaður íslenska landsliðsins í fótbolta, eftir 1-1 jafntefli strákanna okkar gegn Portúgal í fyrsta leik liðsins á Evrópumótinu í fótbolta. Birkir skoraði jöfnunarmarkið í byrjun seinni hálfleiks eftir frábæra sendingu Jóhanns Berg Guðmundssonar.

Þetta er fyrsta markið sem karlalandsliðið skorar á stórmóti og það verður aldrei tekið af Birki.

Strákarnir okkar stimpluðu sig inn með látum á EM í gær með því að ná þessu magnaða jafntefli gegn stórliði Portúgals. Það var nánast erfitt að fylgjast með sorgmæddum leikmönnum Portúgala ganga í gegnum viðtalssvæðið eftir leik. Þeim datt aldrei í hug að jafntefli yrðu loka­úrslitin.

Eflaust voru þeir ekki einir um það. „Ég held að það hafi bara verið Íslendingar sem höfðu trú á að við gætum gert eitthvað í þessum leik. Maður er bara virkilega stoltur af að ná þessum úrslitum,“ sagði Birkir.

Þessir sömu Íslendingar mættu 8.000 talsins á Stade Geoffroy-Guichard í gærkvöldi og gerðu kvöldið ógleymanlegt. Þeir áttu stúkuna gegn 16.000 Portúgölum. Stundin eftir leik þegar strákarnir fóru og þökkuðu fyrir stuðninginn er eitthvað sem allir 8.000 plús 23 og þjálfararnir eiga eftir að muna lengi.

Velkomnir aftur!



Þó Birkir hafi á endanum verið hetja íslenska liðsins og spilaði frábærlega í seinni hálfleik átti hann erfitt uppdráttar í þeim fyrri. Strákarnir voru búnir að bíða eftir leiknum í sjö mánuði eða síðan dregið var í byrjun desember á síðasta ári. Það fór ekki á milli mála að stress var í okkar mönnum þó þeir fengju eitt dauðafæri til að byrja með sem Gylfi Þór klúðraði.

Íslenska liðið náði ekki að vinna sig inn í leikinn í fyrri hálfleik og þorði varla að vera með boltann. Sumir leikmanna liðsins misstu smá trú á eigin getu og treystu hvorki fyrstu né annarri snertingu. Varnarleikurinn var misjafn og fékk Portúgal færi til að skora fleiri en þetta eina mark sem Nani setti.

Eftir hálft ár af frekar döprum vináttuleikjum var spurning margra til strákanna: Hvenær ætlið þið að ýta á „ON“-takkann? Svarið fengu allir í seinni hálfleik. Frá og með 46. mínútu í Saint-Étienne í gær sáu öll álfan af hverju þessir strákar eru komnir í lokakeppni EM í fyrsta sinn og að það var engin heppni.

Vissulega voru Portúgalar meira með boltann en varnarleikurinn var nánast óaðfinnanlegur frá fremsta manni til þess aftasta. Hannes Þór var magnaður í markinu og sópaði upp það sem til þurfti. Allir börðust fyrir hvorn annan og gerðu Portúgölunum erfitt fyrir. Samvinna er samasem vinna söng góður maður og þannig vinnur íslenska landsliðið fótboltaleiki.

Vináttuleikjunum er lokið. Þessir strákar þrífast á alvöru leikjum og þetta var einn slíkur. Skilaboðin skýr: Strákarnir eru mættir hingað til að gera hluti.

Enginn höfðatölusigur



„Við vorum búnir að spila marga æfingaleiki sem voru ekki nógu góðir en að spila á svona stórmóti er auðvitað allt annar hlutur. Hugarfar leikmanna er allt annað þó það sé skrítið að segja það. Við spiluðum frábærlega þó þeir pressuðu okkur vel og lengi,“ sagði markaskorarinn Birkir eftir leikinn.

Einhvern tíma hefðu svona úrslit verið kölluð höfðatölusigur eins og þegar Ísland „vann“ Frakkland 1-1 á Laugardalsvellinum fyrir sextán árum. Höfðatölusigrar hentuðu okkur þegar við vorum litlir og slakir. Við erum enn þá litlir en langt frá því að vera slakir.

Þessir strákar þurfa enga höfðatölusigra. Á síðustu 20 mánuðum er liðið búið að leggja Tyrki, Tékka og Hollendinga tvisvar á leið á stórmót og ná svo í þetta gríðarlega flotta og mikilvæga stig gegn Portúgal. Þetta var enginn höfðatölusigur. Þetta er bara stig í lok dagsins sem gerir ekkert nema strákarnir haldi áfram og vinni Ungverja.

Það besta er að þeir vita það sjálfir.

Söguleg stund í Saint-Étienne að baki. Íslenska þjóðin fagnar næstu daga en strákarnir voru komnir í endurheimt strax eftir leik og byrjaðir að hugsa um Ungverja. Þannig hugsa sigurvegarar og sigurvegarar ná úrslitum.