Giroud: Vil hrósa íslenska liðinu

Olivier Grioud var útnefndur maður leiksins af Knattspyrnusambandi Evrópu, UEFA, í kvöld og mætti því á blaðamannafund eftir leikinn í kvöld.

„Það er alltaf gaman að vera útnefndur maður leiksine en ég mun fyrst og fremst muna eftir því að við fórum áfram og spiluðum vel. Við skoruðum fimm mörk og við vorum mjög ánægðir.“

„En við fengum líka tvö á okkur og Ísland gafst aldrei upp. Við vissum það enda Íslendingar mjög ákveðnir. Þeir héldu áfram allt til loka og ég vil hrósa íslenska liðinu fyrir frábært EM.“

„Við munum njóta sigursins og hvíla vel fyrir leikinn á fimmtudag. Það verður allt annað að spila gegn Þýskalandi enda heimsmeistararnir. Við unnum þá 2-0 í vináttulandsleik en þetta verður allt öðruvísi.“

Hann hrósaði frönskum stuðningsmönnum fyrir frammistöðuna í kvöld og vonar að franska liðið fái áfram mikinn stuðning.

„Við erum heppnir að fá að spila á heimavelli og ég er mjög stoltur af þessu franska liði,“ sagði hann en Giroud var einnig spurður hvort að leikurinn í kvöld hafi verið hans besti í treyju franska liðsins.

„Ég hef spilað nokkra góða leiki en kannski var þetta minn besti leikur fyrir Frakkland á stórmóti. Mér leið mjög vel strax frá fyrstu mínútu. Við höfðum byrjað leiki okkar illa á mótinu en við breyttum því í kvöld og þurfum að halda uppteknum hætti.“