Hvorki leki né dræm kjörsókn gat stöðvað Macron

Emmanuel Macron, forsetaframbjóðandi En Marché! í Frakklandi, verður næsti forseti Frakklands ef marka má þær tölur sem höfðu birst þegar Fréttablaðið fór í prentun.

Eftir fyrstu tölur spáði Kantar Public One Point-TF1-RTL því að Macron hlyti 65,5 prósent atkvæða. Marine Le Pen, frambjóðandi Þjóðfylkingarinnar, stefndi hins vegar í að fá 34,5 prósent atkvæða.

„Nýr kafli í sögu þjóðar okkar var skrifaður í kvöld. Ég vona að hann einkennist af von,“ sagði Macron þegar úrslitin voru ljós.

„Frakkar hafa valið lýðveldinu nýjan forseta. Þeir völdu óbreytt ástand. Ég hringdi í Emmanuel Macr­on­ til að óska honum til hamingju. Ég vil Frakklandi hið besta og óska honum því velgengni,“ sagði Le Pen á fundi með stuðningsmönnum.

Þá sagði hún jafnframt að flokkur sinn yrði sterkasta stjórnarandstaðan. Hinir flokkarnir, sem studdu Macron, gætu ekki talist marktæk stjórnarandstaða.

Ef ekkert óvænt kom upp á í nótt mun Macron því taka við af François Hollande sem gegnt hefur embættinu frá árinu 2012. Hollande ákvað sjálfur að bjóða sig ekki fram til annars kjörtímabils en vinsældir hans voru afar litlar. Varð hann óvinsælasti forseti Frakklandssögunnar í september síðastliðnum þegar hann mældist með fimmtán prósenta stuðning. Mánuði seinna greindi France24 frá því að forsetinn mældist með fjögurra prósenta stuðning.

Þann fjórtánda maí næstkomandi mun Hollande víkja úr embætti og Macron líklegast taka við. Búist er við því að Macron útnefni fljótlega forsætisráðherra sinn áður en kosið verður til þings í júlí. Eins og stendur á flokkur Macron ekkert sæti á þingi.

Macron þótti fyrirfram mun sigur­stranglegri en Le Pen eftir að hafa fengið flest atkvæði í fyrri umferð kosninganna. Spáðu kannanir honum svipuðum sigri og virtist stefna í þegar Fréttablaðið fór í prentun.

Því hafði verið spáð að dræm kjörsókn gæti þó haft slæm áhrif á gengi Macrons. Skaut það því ef til vill stuðningsmönnum hans skelk í bringu þegar útlit var fyrir að minnstu kjörsókn í áratugi. Greindi innanríkisráðuneytið til að mynda frá því um miðjan dag að það stefndi í 65 prósenta kjörsókn. Það virðist þó ekki hafa haft áhrif.

Þá virðist sem svo að gagnaleki úr herbúðum Macrons hafi heldur ekki haft áhrif. Óprúttnir tölvuþrjótar stálu níu gígabætum gagna úr herbúðum Macrons og láku á netið stuttu fyrir kosningar. Fjölmiðlar í Frakklandi máttu hins vegar ekki greina frá því vegna reglna um að ekki megi fjalla um kosningabaráttuna þegar svo stutt er í kosningar. Framboð Macrons sagði þó að innan um skjölin reyndust einnig fölsuð skjöl.

Macron, sem verður yngsti forseti í sögu Frakklands, þykir öllu frjálslyndari en Le Pen. Er hann til að mynda hlynntur áframhaldandi veru Frakklands í Evrópusambandinu, skattalækkunum á fyrirtæki og nýjum fríverslunarsamningum.

Innflytjendamál voru eitt heitasta mál kosningabaráttunnar. Macron vill meðal annars koma upp 5.000 manna landamæragæslu, krefja innflytjendur um að kunna frönsku vilji þeir verða ríkisborgarar og fræða alla trúarleiðtoga um frönsk gildi. Le Pen vildi hins vegar loka á allan innflutning fólks, reka erlenda glæpamenn og fólk með tengsl við hryðjuverkasamtök úr landi og loka moskum öfgamanna.