Bonucci kominn til AC Milan

Hið nýríka AC Milan heldur áfram að eyða grimmt á leikmannamarkaðnum og nú er félagið búið að kaupa varnarmanninn magnaða, Leonardo Bonucci, frá meisturum Juventus.

Þessi þrítugi varnarmaður kostaði Milan 35 milljónir punda eða 4,8 milljarða króna. Hann skrifaði undir fimm ára samning við Milan.

Forráðamenn Milan eru því búnir að eyða 160 milljónum punda í leikmenn í sumar. Það er nóg til hjá nýju eigendunum sem ætla að koma Milan aftur á toppinn í Evrópu.

Juventus keypti á sama tíma hinn 24 ára gamla bakvörð Mattia de Sciglio á 10 milljónir punda frá Milan.