Coutinho: Draumur að rætast

Philippe Coutinho varð um helgina dýrasti leikmaðurinn í sögu Barcelona er félagið greiddi Liverpool 142 milljónir punda fyrir hann.

Hann stillti sér upp fyrir myndavélarnar í gær og verður formlega kynntur fyrir stuðningsmönnum í dag.

„Hæ, stuðningsmenn Barcelona. Ég er mættur og það er draumur að rætast hjá mér. Hlakka til að sjá ykkur á morgun,“ sagði Coutinho í myndbandsskilaboðum í gær.

Coutinho sagðist síðan vera spenntur fyrir því að spila með Luis Suarez og Lionel Messi.

„Það verður gaman að spila með þeim, læra af þeim og vinna með þeim,“ sagði Brasilíumaðurinn.

Hann mun skrifa undir fimm og hálfs árs samning við Börsunga og það mun kosta 355 milljónir punda að losa hann undan samningi við spænska félagið.