Frakkar sendu Svía í undanúrslit │ Spánverjar sigruðu Þýskaland

Spánverjar tryggðu sér seinna undanúrslitasætið úr milliriðli tvö á Evrópumótinu í handbolta með góðum sigri á Þjóðverjum í lokaleik riðilsins.

Danir voru búnir að tryggja sér sigur í riðlinum fyrir leikinn, en Spánverjar og Þjóðverjar tókust á um síðara lausa sætið í undanúrslitunum.

Leikurinn byrjaði vel fyrir Þjóðverja sem voru skrefi á undan fyrsta korterið, en aldrei varð forystan þó meiri en eitt mark. Spánverjar komust yfir eftir 14 mínútur og náðu því yfirhöndinni, en áfram var leikurinn mjög jafn. Það var ekki fyrr en fimm mínútur lifðu af hálfleiknum sem Spánverjar komust í tveggja marka forystu í fyrsta skipti. Staðan í leikhléi var 13-14 fyrir Spán.

Hálfleiksræðan hefur kveikt í spænska liðinu því það var miklu sterkari aðilinn í byrjun seinni hálfleiks. Eftir að staðan var 15-15 eftir 33 mínútur skoruðu Spánverjar næstu átta mörk og komu stöðunni í 15-23.

Þá kviknaði aftur í Þjóðverjum en það var í raun bara of seint í taumana gripið og Spánverjar fóru með fjögurra marka sigur, 27-31.

Króötum dugði jafntefli gegn Frökkum til þess að tryggja sig áfram í undanúrslitin eftir að Noregur hafði betur gegn Svíum fyrr í dag.

Það var jafnræði með liðunum til að byrja með og skiptust þau á að hafa forystu. Eftir um korters leik var jafnt með liðunum en þá settu Frakkar í annan gír og komu sér upp forystu sem Króatar náðu ekki að vinna til baka.

Þegar gengið var til búningsherbergja voru Frakkar með sex marka forystu, 13-19.

Leikurinn hékk í fjögurra til sex marka forystu Frakka framan af í seinni hálfleik en Króatar náðu að klóra í bakkann þegar um tíu mínútur lifðu af leiknum og náðu að minnka muninn í eitt mark. Nær komust þeir þó ekki og lokatölur urðu 27-30 fyrir Frakka.

Liðin sem fara í undanúrslit á Evrópumótinu eru því Frakkland og Svíþjóð úr milliriðli eitt og Danmörk og Spánn úr milliriðli tvö. Frakkar og Spánverjar mætast annars vegar og hins vegar verður Norðurlandaslagur Svía og Dana. Króatía og Tékkland leika um fimmta sæti mótsins.