Litli frændi Gylfa Sig skoraði glæsilegt mark í úrslitaleik N1-mótsins

Lárus Orri Ólafsson, tólf ára gamall frændi Gylfa Þórs Sigurðssonar, sonur Ólafs Más Sigurðssonar, bróður Gylfa, og Lilju Karítasar Lárusardóttur, var hetja FH á N1-mótinu í fótbolta sem lauk á Akureyri um helgina.

Þetta risavaxna fótboltamót sem KA-menn halda fyrir drengi í fimmta flokki á ellefu og tólf ára aldri fór vel fram að vanda en í úrslitaleiknum mættust FH 1 og HK 1. FH-ingar fögnuðu sigri, 3-0.

FH komst í 2-0 og lagði Lárus Orri upp annað markið en hann rak svo smiðshöggið á sigurinn með marki sem stóri frændi væri sjálfur stoltur að skora. Að sjálfsögðu var það beint úr aukaspyrnu eins og Gylfi Þór hefur gert að listgrein.

Lárus Orri tók spyrnu vinstra megin við teiginn og skoraði með þrumuskot í fjærhornið og innsiglaði glæsilegan sigur FH á mótinu. HK-ingar, sem eru vanir því að keppa til úrslita og vinna N1-mótið, þurftu að lúta í gras að þessu sinni.

Lárus Orri kom ekki bara við sögu í úrslitaleiknum því hann kom FH bæði í undanúrslitin og úrslitaleikinn með því að skora úr síðustu spyrnu í vítaspyrnukeppni. Lárus tók 22. vítaspyrnuna í ótrúlegri vítaspyrnukeppni FH og KA í undanúrslitum og skilaði sínum mönnum í úrslitin.

Fleiri synir landsliðsfólks tóku þátt í úrslitaleiknum en með Lárusi í liði voru bæði synir Rakelar Ögmundsdóttur og Arnars Þórs Viðarssonar. Daniel Tristan Guðjohnsen, yngsti sonur Eiðs Smára, var í tapliði HK.

Frábært mark Lárusar má sjá í spilaranum hér að neðan en það kemur á 9:58:36. KA TV sýndi beint frá öllum leikdögum mótsins en þáttur Sumaramótanna um N1-mótið verður á dagskrá á Stöð 2 Sport klukkan 21.15 á fimmtudagskvöldið.