Þór/KA byrjar á sigri í Meistaradeildinni

Þór/KA byrjar vel í undanriðli fyrir Meistaradeild kvenna en Íslandsmeistararnir unnu 2-0 sigur á Linfield í kvöld.

Fjögurra liða riðill er leikinn í Belfast á Norður-Írlandi en góð byrjun hjá Íslandsmeisturunum.

Þær komust yfir strax á tólftu mínútu er Arianna Calderon kom þeim yfir eftir undirbúning Andreu Mist Pálsdóttur.

Tólf mínútum síðar klúðraði Sandra Stephany Mayor víti en það kom ekki að sök því hún bætti fyrir það sjö mínútum fyrir leikslok er hún tryggði norðanstúlkum 2-0 sigur.

Ajax vann sinn leik í dag 4-1 og því eru Ajax og Þór/KA með þrjú stig. Næst mætir Þór/KA liði Wexford Youths en í lokaleiknum spila þær við Ajax.