Segjast fullvissir um að fá Pogba og Hazard

Forráðamenn Real Madrid eru vissir um að þeir muni ná að landa bæði Paul Pogba og Eden Hazard í sumar samkvæmt heimildum Sky Sports.

Búist er við því að Zinedine Zidane hreinsi til á Santiago Bernabeu í sumar og það verði mikil breyting á liðinu frá því í vetur.

Þeir leikmenn sem eru efstir á óskalistunum eru Pogba og Hazard.

Pogba hefur verið mikið í umræðunni síðasta árið, ítrekað orðaður við Real Madrid og sagður vilja frá Manchester United. United hefur gengið illa undan farið og ef liðið missir af Meistaradeildarsæti er talið næsta víst að Frakkinn muni leita annað.

Hazard verður samningslaus að ári. Chelsea hefur ekki náð að framlengja við belgíska miðjumanninn svo þeir bláklæddu eru líklegir til þess að selja hann í sumar og koma í veg fyrir að hann fari frítt næsta sumar. Real þarf þó að borga 100 milljónir punda fyrir Hazard.

Báðir hafa þeir sagt í viðtölum á síðustu mánuðum að það væri draumur að spila fyrir real Madrid.