Forseti Real Madrid vildi ekki leyfa Ramos að fara til Kína

Florentino Pérez, forseti Real Madrid, hafnaði beiðni Sergios Ramos, fyrirliða liðsins, að fara liðs í Kína.

Í útvarpsviðtali greindi Pérez frá því að Ramos og umboðsmaður hans hafi hitt hann að máli og tjáð honum og borist hefði mjög gott tilboð frá Kína. Reglur kínversku deildarinnar hafi hins vegar komið í veg fyrir að félagið gæti borgað upphæðina.

Pérez var ekki tilbúinn að leyfa Ramos að fara frítt frá Real Madrid sem hann hefur leikið með síðan 2005.

„Hvað átti ég að segja honum? Við sögðum að þetta kæmi ekki til greina, að Real Madrid gæti ekki leyft fyrirliðanum að fara frítt. Með því hefði félagið sett skelfilegt fordæmi fyrir aðra leikmenn,“ sagði Pérez.

Enginn í leikmannahópi Real Madrid hefur verið lengur hjá félaginu en Ramos. Á 14 árum hjá Real Madrid hefur Ramos fjórum sinnum orðið spænskur meistari, tvisvar sinnum bikarmeistari og fjórum sinnum unnið Meistaradeild Evrópu.

Real Madrid olli miklum vonbrigðum á nýafstöðnu tímabili. Madrídingar enduðu í 3. sæti spænsku úrvalsdeildarinnar og féllu úr leik fyrir Ajax í 16-liða úrslitum Meistaradeildarinnar.

Ramos var í leikbanni í seinni leiknum gegn Ajax. Hann var fundinn sekur um að hafa fengið gult spjald að ásettu ráði í fyrri leiknum til að geta hvílt í þeim seinni. Það kom hins vegar í bakið á honum og liðsfélögum hans.