Hazard í sjöuna hjá Real Madrid

Spænskir fjölmiðlar fullyrða að belgíski sóknarmaðurinn Eden Hazard muni verða úthlutað treyju númer sjö þegar hann verður kynntur til leiks sem nýr leikmaður spænska stórveldisins Real Madrid.

Real Madrid pungar út tæpum 100 milljónum punda til að fá Hazard í sínar raðir frá Chelsea og gæti sú upphæð farið upp fyrir 100 milljónir punda takist Hazard að vinna titla hjá Madridarliðinu.

Hazard er búinn að samþykkja fimm ára samning við Real Madrid og mun hirða treyju númer sjö af framherjanum Mariano Diaz. Sá skoraði aðeins fjögur mörk í 19 leikjum með Real Madrid á nýafstaðinni leiktíð og á tæplega framtíð á Santiago Bernabeu.

Á undan honum var Cristiano Ronaldo í treyju númer sjö en hann tók við númerinu af goðsögninni Raul Gonzalez.