Griezmann fær ekki sjöuna hjá Barcelona

Franski markahrókurinn Antoine Griezmann gekk í raðir spænska stórveldisins Barcelona um helgina en hann kemur til Katalóniurisans eftir að hafa stimplað sig inn sem einn allra besti sóknarmaður heims með Atletico Madrid á undanförnum árum.

Griezmann var kynntur til leiks við hátíðlega athöfn á Nývangi í gær og kom þar í ljós að hann mun klæðast treyju númer 17 hjá Barcelona.

Þessi 28 ára gamli Frakki hefur verið í treyju númer sjö hjá Atletico og einnig hjá franska landsliðinu. Voru orðrómar á kreiki þess efnis að hann myndi hirða sjöuna af Philippe Coutinho hjá Barca þar sem talið er að sá brasilíski gæti verið á förum.

Hefur Coutinho verið orðaður við endurkomu til Liverpool en hann hefur einnig verið orðaður við Manchester United.