Ösku­bu­sku­ævin­týri Madagaskar lokið

Spútniklið Madagaskar er úr leik í Afríkukeppninni þetta árið eftir 3-0 tap gegn Túnis í síðasta leik átta liða úrslitanna.

Liðið hafði komið allri heimsbyggðinni á óvart með mögnuðum árangri sínum í Afríkukeppninni en þetta er í fyrsta sinn sem Madagaskar tekur þátt.

Þeir réðu hins vegar ekki við öflugt lið Túnis. Eftir markalausan fyrri hálfleik skoruðu þeir Ferjani Sassi, Naim Sliti og Youssef Msakni sitt markið hver og lokatölur 3-0.

Það verða því Senegal og Túnis annars vegar og Alsír og Nígería hins vegar sem mætast í undanúrslitunum í Afríkukeppninni þetta árið. Undanúrslitin fara fram á sunnudag.