Enginn komið að fleiri mörkum en Bruno

Síðan Bruno Fernandes lék sinn fyrsta leik fyrir Manchester United þann 6. febrúar á þessu ári þá hefur enginn leikmaður ensku úrvalsdeildarinnar komið að fleiri mörkum.

Bruno tók Man Utd einfaldlega á herðarnar við komu sína til liðsins en félagið var þá án Marcus Rashford og Paul Pogba. Portúgalinn hefur verið frábær í nær öllum þeim leikjum sem hann hefur spilað og gerði hann tvö mörk í 3-0 sigri Man Utd á Brighton & Hove Albion í kvöld.

Miðjumaðurinn öflugi hefur nú leikið 13 í rauðu treyjunni og hefur komið að tíu mörkum. Sex sinnum hefur hann komið knettinum í netið og þá hefur hann lagt upp fjögur önnur til viðbótar.