„Held hann eigi enga framtíð hjá Val“

Gummi Ben, Atli Viðar Björnsson og Tómas Ingi Tómasson ræddu stöðu Ólafs Karl Finsen hjá Val í síðasta þætti af Pepsi Max Stúkunni. Umræðuna um framtíð Ólafs Karls hjá Val má sjá í spilaranum neðst í fréttinni.

„Ólafur Karl Finsen, við verðum að ræða hann aðeins til að pirra einhverja,“ sagði Gummi Ben og glotti við tönn. Benti svo á að Ólafur Karl hefði ekki verið í leikmannahóp liðsins í leiknum og spurði þá Atla Viðar og Tómas Inga beint út hvort leikmaðurinn ætti framtíð hjá félaginu.

„Ég valdi hann sem einn af mínum uppáhalds í byrjun en hann hefur ekki sést mikið síðan þá. Þannig ég held að hann eigi enga framtíð í Val. Það eru skýr skilaboð þegar hann kemst ekki í hópinn þegar hann á að vera orðinn heill. Fyrir mér eru það mjög skýr skilaboð um að þú getur alveg farið að skoða eitthvað annað,“ sagði Tómas Ingi.

„Fyrir mér snýst þetta um hugarfarið hans. Er hann búinn að gefa feril sinn hjá Val upp á bátinn eða er hann tilbúinn að berjast fyrir sínu því við vitum allir hvað hann er hrikalega góður þegar hann er á sínu mómenti og er að skila því sem við vitum að hann getur,“ sagði Atli Viðar í kjölfarið.

„Heimir (Guðjónsson, þjálfari Vals) hefur verið spurður út í þetta og hann segir að Ólafur Karl sé að koma úr meiðslum og sé ekki klár í þetta,“ sagði Gummi svo að lokum.