Hver stór­stjarnan á fætur annarri samnings­laus í sumar

Fjöldi stórstjarna úr mörgum af stærstu liðum Evrópu eru að renna út á samning og verður forvitnilegt að sjá hvað gerist. Nú þegar kórónufaraldurinn hefur haft gríðarleg áhrif á tekjumöguleika knattspyrnuliða Evrópu er ljóst að það verður hart slegist um þá bita sem hægt er að fá á frjálsri sölu.

Lionel Messi eru augljóslega stærsta nafnið sem rennur út á samning í sumar en Argentínumaðurinn hefur verið orðaður við Manchester City, Paris Saint-Germain og svo óvænt Bandaríkin en hann segir sjálfur að hann hafi alltaf viljað spila þar. Hinn 32 ára gamli Sergio Agüero, samlandi Messi og framherji Manchester City, er einnig samningslaus næsta sumar en þó hann verði 33 ára þann 2. júní eru fáir framherjar betri í vítateig andstæðinganna en Agüero.

Önnur stórstjarna sem verður samningslaus í sumar er svo Sergio Ramos, fyrirliði Spánarmeistara Real Madrid. Ramos verður orðinn 35 ára gamall er samningur hans við Real rennur út en miðað við það að varnarleikur spænsku meistaranna er hvorki fugl né fiskur án hans þá ætti að vera mikil eftirspurn eftir kröftum Ramos næsta sumar.

Gini Wijnaldum – miðjumaður Englandsmeistara Liverpool og hollenska landsliðsins – er samningslaus næsta sumar og eru þrálátir orðrómar um að þessi þrítugi leikmaður sé á leið til Barcelona. Vitað er af áhuga Ronald Koeman, þjálfara Börsunga, og Wijnaldum hefur ekki enn skrifað undir nýjan samning við Liverpool. Memphis Depay, samlandi þeirra Wijnaldum og Koeman, er einnig á óskalista Barcelona en samningur hans við franska félagið Lyon rennur út í sumar.

Memphis hefur verið frábær með Lyon á tímabilinu eftir að misst af stórum hluta síðasta tímabils vegna meiðsla á hné. Hann hefur skorað átta mörk og lagt upp fjögur í 17 deildarleikjum á tímabilinu. Memphis verður 27 ára næsta sumar og því á besta aldri.

Ítalski markvörðurinn Gianluigi Donnarumma verður samningslaus næsta sumar en þrátt fyrir ungan aldur hefur hann varið mark AC Milan um árabil. Donnarumma segist vilja skrifa undir nýjan samning við topplið Serie A en Mino Raiola er umboðsmaður hans og aldrei að vita hverju sá tekur upp á.

Ef Donnarumma verður óvænt á markaðnum má reikna með að fjöldi liða hafi áhuga á þessum 22 ára gamla markverði sem hefur nú þegar leikið 191 leik fyrir AC Milan og 22 fyrir ítalska A-landsliðið.

Síðast en ekki síst þá rennur David Alaba út á samning næsta sumar. Hinn 28 ára gamli Austurríkismaður hefur verið orðaður við Real Madrid en svo virðist sem Evrópumeistarar Bayern München geti ekki borgað hinum fjölhæfa Alaba þá upphæð sem hann vill. Alaba er einn af best spilandi varnarmönnum heimsins og getur leikið í stöðu vinstri bakvarðar, miðvarðar eða miðjumanns.

Athyglisverðir leikmenn sem verða samningslausir 2021