Segir að það hafi verið ó­mögu­legt að dekka Messi

Hinn 35 ára gamli Luís var í ítarlegu viðtali á dögunum þar sem hann ræddi tíma sinn hjá Atlético Madrid og Chelsea ásamt því að ræða viðureign liðanna í 16-liða úrslitum Meistaradeildar Evrópu. 

Hann gekk fyrst í raðir Atlético frá Deportivo La Coruña árið 2010. Þaðan fór hann til Chelsea árið 2014 en sneri aftur ári síðar eftir að hafa lítið spilað í Lundúnum.

Í viðtalinu ræðir bakvörðurinn hvernig það hafi verið að spila gegn Messi en þeir mættust nokkuð oft á tíma Luís á Spáni.

„Einn daginn væri ég til í að spyrja Messi hvernig það var að spila gegn mér. Ég tók því alltaf sem mikilvægasta leik lífs míns vegna þess að hann var besti leikmaður sem ég hafði séð spila. Messi var með ákveðinn hlut í leik sínum sem var mjög mikilvægur, ég komst að því þar sem ég fylgdist mikið með honum,“ sagði Luís sem spilar í dag með Flamengo í heimalandinu.

„Ég horfði á hvert einasta skipti sem hann snerti boltann, ég spólaði til baka og horfði aftur, spólaði til baka og horfði aftur. Þá komst ég að því, Messi er ekki búinn að ákveða hvað hann ætlar að gera fyrir fram. Hann horfði á varnarmennina og ákvað í kjölfarið hvert hann myndi fara.“

„Fyrst reyndi ég að koma í veg fyrir að hann fengi boltann. Þegar hann fékk boltann með bakið í mig þá fór ég í hann eða boltann. Af því hann er svo sterkur og neitar að fara niður í leit að aukaspyrnum þá færðu ekki dæmdar á þig aukaspyrnur. Hann fær boltann í fætur og kemst einn á einn gegn þér þá er ómögulegt að stöðva hann. Það var allavega þannig þá, kannski er það öðruvísi í dag.“ 

Af hverju var ómögulegt að ná boltanum af Messi?

„Af því hann var aldrei búinn að ákveða hvað hann ætlaði að gera. Ég þóttist fara í tæklingu þeim megin sem ég vildi ekki að hann myndi fara. Ég reyndi venjulega að þvinga hann til vinstri þar sem ég fór í tæklingu og náði annað hvort boltanum eða honum. Ef ég náði honum ekki þá kom hjálparvörn, tveir á mótu einum.“

„Það voru leikir þar sem ég fór of langt og var rekinn út af. Hann sagði aldrei neitt, ég held honum hafi líkað við áskorun af þessu tagi. Bestu leikirnir mínir voru alltaf gegn Messi. Hann átti leiki þar sem hann snerti ekki boltann, ég leyfði honum það ekki. Ég elti hann út um allt, hann gat flakkað á milli kanta en alltaf elti ég hann,“ sagði bakvörðurinn öflugi að lokum.

Leikur Atlético Madrid og Chelsea í 16-liða úrslitum Meistaradeildar Evrópu er í beinni útsendingu Stöðvar 2 Sport klukkan 20.00 í kvöld.