Kaupa allt hluta­fé í Nóa Síríus og Finnur hættir sem for­stjóri

Þetta kemur fram í tilkynningu frá Deloitte á Íslandi sem hafði umsjón með söluferlinu. Þar segir að sögu Nóa Síríus megi rekja allt aftur til ársins 1920, en þar starfa í dag um 120 manns.

Orkla er leiðandi fyrirtæki á neytendavörumarkaði á Norðurlöndunum, Eystrasaltsríkjunum og völdum mörkuðum í Mið-Evrópu og á Indlandi. Orkla er skráð á hlutabréfamarkað í Noregi og eru höfuðstöðvar fyrirtækisins í Osló. Velta félagsins árið 2020 var um 47 milljarður norskra króna og eru starfsmenn félagsins yfir 21 þúsund talsins.

Orkla hefur verið 20% hluthafi í Nóa Síríus undanfarin tvö ár en fyrirliggjandi samkomulag felst í kaupum á hlutum annarra hluthafa. Aðilar hafa komið sér saman um að gefa ekki upp kaupverð viðskiptanna. Fjármálaráðgjöf Deloitte hafði umsjón með ferlinu og var ráðgjafi seljenda. Kaupin eru háð samþykki Samkeppniseftirlitsins.

Í tengslum við þessi viðskipti, hefur Finnur Geirsson forstjóri Nóa Síríus, óskað eftir að láta af störfum eftir 31 ár sem forstjóri félagsins. Finnur mun þó halda áfram sem forstjóri félagsins til 1. ágúst næstkomandi, þegar Lasse Ruud-Hansen mun taka við stöðunni en hann hefur víðtæka reynslu innan FMCG iðnaðarins og var síðast SVP Business Development hjá Orkla Consumer & Financial Investments,“ segir í tilkynningunni.

Velta Nóa Síríus árið 2020 var um 3,6 milljarðar.

Vaxtarmarkaður

Haft er eftir Jaan Ivar Semlitsh, forstjóra Orkla að Nói Síríus hafi sérstöðu á Íslandi sem falli vel að eignasafni Orkla af leiðandi vörumerkjum. „Við sjáum möguleika á að skapa verðmæti með því að halda áfram að byggja á sterkri stöðu Nóa Síríus á Íslandi, en jafnframt auka vöruúrvalið. Súkkulaði, snakk og sælgæti eru kjarnaflokkar fyrir Orkla. Ísland er vaxtarmarkaður og við ætlum að vera hluti af þeim vexti.”

Einnig er haft eftir Finni Geirssyni , fráfarandi forstjóra Nóa Síríus hf., að á þessum tímamótum sé hann sérstaklega stoltur af því að hafa, ásamt framúrskarandi samstarfsfólki, byggt upp fyrirtæki og vörumerki Nóa Síríusar. „Þegar eitt stærsta fyrirtæki Norðurlandanna á þessu sviði sýnir fyrirtækinu jafn mikinn áhuga og raun ber vitni, fyrst sem minnihluthafi og í kjölfarið með núverandi samkomulagi, er það skýr vitnisburður um einstakan árangur. Við erum jafnframt ánægð með kaupandann, sem er öflugur aðili með víðtæka þekkingu á starfsemi af þessu tagi, og teljum við að Nói Síríus verði í góðum höndum með Orkla. Fyrir þeim vakir að hlúa að okkar ágætu vörumerkjum sem hafa unnið sér hylli á löngum ferli fyrirtækisins.“