Gugga um lífið eftir ferilinn : Stefndi á EM 2021, gat ekki neitað til­­­­­boði Eskil­s­tuna og vildi vera meira með tví­burunum

Gugga, eins og hún er nær alltaf kölluð, átti einkar farsælan feril sem markvörður. Hún byrjaði með FH hér heima, fór þaðan yfir í Val þar sem hún fjölda titla. Þaðan lá leiðin til Svíþjóðar en einnig hefur hún spilað í Þýskalandi og Noregi þar sem hún vann deildar- og bikartitla með Lilleström. Þá lék hún alls 64 A-landsleiki.

Þessi öflugi markvörður ætlaði að spila með Arna-Bjørnar í Noregi í vetur eftir að hafa tekið sér frí frá fótbolta vegna barnsburðar. Áætlanir hennar í Noregi gengu ekki upp og því ákvað hún að rifta samningi sínum, fara heim til Svíþjóðar og setja hanskana upp í hillu. 

Í kjölfarið fékk hún tilboð frá Eskilstuna sem leikur í sænsku úrvalsdeildinni um að verða markmannsþjálfari hjá liðinu, eitthvað sem hún hafði alltaf stefnt að þegar hanskarnir færu upp í hillu.

Ég elska fótbolta en ég elska börnin mín meira

„Það er erfið ákvörðun fyrir allasem  ákveða að enda ferilinn, sama í hvaða íþrótt það er. Ég ætlaði alltaf að spila með landsliðinu á EM næsta sumar. Það var alltaf markmiðið þegar ég var ólétt af tvíburunum.“

„Það sem maður hugsar samt ekki alveg út í - eða ég áttaði mig ekki alveg á – er hversu mikil lífsbreyting þetta er. Það er alveg hægt að komast í jafn gott form og maður var í en að finna tímann til að gera allt jafn vel og áður, ég bara fann hann ekki. Ég elska fótbolta en ég elska börnin mín meira. Ég dáist hreinlega að stelpunum sem ná að gera þetta bæði af fullum krafti, spila fótbolta og eiga börn.“

Gugga íhugaði að vera áfram leikmaður en engin af þeim tilboðum sem hún og Mia Jalkerud, kærasta hennar, fengu var nægilega heillandi.

„Við fjölskyldan hefðum alltaf þurft að flytja og vorum ekki tilbúin í það. Við Mia vorum komnar inn á að flytja heim til Stokkhólms, komast í rútínu og taka stöðuna út frá því. Þá kom Eskilstuna upp og í raun sannfærði mig um að ég gæti orðið geggjaður markmannsþjálfari.“

„Ég stefndi alltaf á að verða markmannsþjálfari þegar ég myndi hætt aða spila, hvenær sem það yrði. Hugsaði svo að ef lið í Allsvenskan (sænsku úrvalsdeildinni) vildi fá mig til starfa nú þegar þá væri það einfaldlega geggjað tækifæri.“

„Svo hentaði það vel á þessum tímapunkti. Ég hefði örugglega alltaf hætt eftir EM næsta sumar og veit ekkert hvernig það hefði gengið að komast inn í markmannsþjálfun þá. Mér fannst þetta því nokkuð góð lending, að verða markmannsþjálfari. Þá get ég líka verið með á æfingum einstaka sinnum,“ sagði markvörðurinn fyrrverandi og hló.

Lífið eftir ferilinn gengur ágætlega

„Þetta mun ganga mjög vel þegar Olivia og William fara á leikskóla. Sem stendur næ ég ekki að mæta á allar æfingar, er samt á flest öllum. Er að mæta svona þrisvar til fjórum sinnum í viku sem og í heimaleikina, sleppi útileikjunum sem stendur.“

„Það voru aðallega leikirnir í Noregi sem gerðu þetta erfitt fyrir okkur. Þar er gist á hóteli fyrir útileiki og við áttum marga slíka leiki í upphafi móts. Þannig að við vorum kannski í burtu frá Oliviu og William í 30 klukkustundir í senn. Þau voru þá hjá barnapíu sem þau voru nýbúin að kynnast þar sem það var lockdown í Noregi út af Covid-19 á þessum tíma. Ofan á þetta vorum við ekki með leikskólapláss fyrir þau.“

„Þetta var samt mjög erfið ákvörðun (að leggja hanskana á hilluna) þó það sé ákveðinn léttir að hafa tekið hana. Er nokkuð viss um að allt íþróttafólk finni fyrir ákveðnum tómleika þegar ferillinn er á enda en ég hef upplifað þrjú Evrópumót og er mjög spennt fyrir nýju hlutverki, nýjum ferli ef svo má að orði komast.“

„Fæ enn gæsahúð þegar ég hugsa til baka.“

Aðspurð út í hápunktana á ferlinum, þá aðallega með íslenska landsliðinu, þá nefndi Gugga meðal annars 1-0 sigur á Hollandi á EM 2013 og svo 3-2 útisigur á Þýskalandi í undankeppni HM 2019.

„Besta upplifunin var örugglega eftir leikinn gegn Hollandi. Þóra Helgadóttir hafði spilað flesta af stóru leikjunum fram að þessu. Svo missti hún af fyrsta leik á mótinu vegna meiðsla, ég kom inn og stóð mig nægilega vel til að halda sætinu. Hélt því svo út mótið og þetta var örugglega besti leikurinn minn á öllu mótinu.“

„Ég man að Dóri (Halldór Björnsson) markmannsþjálfari kom í miðjum fagnaðarlátunum eftir leik og sagði mér að koma með sér upp að miðju. Man að ég var smá pirruð og skildi ekkert hvað hann var að spá. Hann fór með mig á miðjan völlinn, sagði mér að loka augunum, hlusta og taka þetta inn. Mótið var í Svíþjóð og það var fullt af Íslendingum í stúkunni sem létu vel í sér heyra og voru þarna að syngja nafnið mitt. Þetta var svo mikil upplifun, fæ enn gæsahúð þegar ég hugsa til baka.“

Þann 20. október 2017 mætti Ísland svo Þýskalandi ytra í undankeppni HM 2019. Þar vann íslenska liðið einn ótrúlegasta sigur sögunnar. 

Áður en það kom að þessum leik hafði þýska liðið leikið 68 leiki í undankeppni bæði HM og EM án þess að bíða ósigurs. Það sem meira er, liðið hafði unnið 66 leiki og gert aðeins tvö jafntefli. Það er þangað til Ísland kom í heimsókn.

"Við fórum ekki til Þýskalands, pökkuðum í vörn og vonuðum það besta. Við komumst 3-1 yfir og unnum á endanum 3-2 í ótrúlegum leik.“

Telur jákvætt að stórlið Evrópu séu að stíga upp í kvennaboltanum

Gugga var spurð út í uppgang kvennaboltans í Evrópu og þá þróun sem er að eiga sér stað. Það er að flest stærstu liða álfunnar halda nú úti kvennaliði og virðast vilja vinna titla í bæði karla- og kvennabolta.

Nefnir hún sem dæmi Barcelona sem gjörsigraði spænsku úrvalsdeildina í vor ásamt því að vinna sannfærandi sigur í Meistaradeild Evrópu.

„Þetta byrjar mögulega þegar enska knattspyrnusambandið ákveður að henda töluvert af fjármunum í deildina hjá sér fyrir svona 7-8 árum síðan. Deildin þar hefur verið í uppbyggingu síðan og margar af helst stjörnunum farið í ensku deildina. Enska sambandið setti líka fullt af pening í landsliðið, þær voru ekki með svona góðar áður. Hafa verið að byggja upp söluvöru sem virðist hafa gengið.“

„Sérð aðrar deildir vera að gera slíkt hið sama. Deildin á Spáni til dæmis orðin frábær og bestu liðin þar gjörsamlega geggjuð. Þessi lönd, sem hafa verið hvað stærst karla megin í langan tíma, þau eru orðin geggjuð kvenna megin sem þýðir að áhorfið eykst til muna.“

„Það er mun svalara að Guðbjörg Gunnarsdóttir skrifi undir hjá Barcelona heldur en hjá liði í Skandinavíu sem hefur samt náð mun meiri árangri ef til lengri tíma er litið. Það er kannski skrítið að það sé þannig en þetta hjálpar vonandi til að keyra áhugann enn frekar upp.“ 

„Það er allt önnur krafa í dag.“

Að endingu var Guðbjörg spurð út í markvörslu, umræðuefni sem blaðamaður gæti rætt langt fram í rauðan dauðann. Guðbjörg er 36 ára gömul og man því tímana tvenna er kemur að því að standa milli stanganna.

„Það er allt önnur krafa í dag. Að vera góður í fótunum þegar ég byrjaði að æfa þýddi einfaldlega að geta sparkað langt, sett boltann í ákveðin svæði og leyst einföldustu pressu.“

„Það þarf allt annan leikskilning í dag. Markvörður þarf að vita hvar plássið er út frá hvaða leikkerfi mótherjinn spilar, til dæmis hvort liðið sé með einn eða tvo framherja. Þetta þarftu að vita áður en þú færð sendingu í leik.“

„Í dag þarf markvörður að geta leyst flóknari pressu, spilað út en samt verið tilbúinn að fá boltann aftur. Það er jafn mikilvægt og að geta sparkað langt eða í ákveðin svæði. Þetta var ekki krafa fyrir tíu árum síðan.“

„Svo hefur það breyst hvernig markverðir verjast einn á einn gegn framherjum. Það var alltaf einn af mínum kostum, að vera snögg af línunni. Núna er meira kennt hvernig á að blokka skot af stuttu færi: komast nálægt andstæðingnum, halda líkamanum uppréttum og verja þannig.“

„Ég var sneggri niður og át boltann oft áður en skotið kom. Stundum vill maður bara sjá markverði henda sér fyrir boltann og éta hann upp,“ sagði Guðbjörg Gunnarsdóttir, fyrrverandi landsliðsmarkvörður Íslands og núverandi markmannsþjálfari Eskilstuna, að lokum.