Minnst 22 látnir eftir flóð í Tennes­see

Lög­regla á svæðinu segir að flestir þeirra sem enn er saknað hafi búið á svæðum þar sem vatn í ám óx hve hraðast í rigningunum.

Hrifsaði ungabörn úr fangi föður síns

Á meðal þeirra látnu eru tvö unga­börn, tví­burar sem flóðið hrifsaði úr fangi föður þeirra, að því er segir í frétt AP.

Flóðin skildu eftir sig gríðar­mikið rusl og brak eftir ónýt hús og bíla víða um sveitir og bæi. Björgunar­sveitir ganga nú hús úr húsi til að at­huga með fólk og reyna að finna þá sem enn er saknað.

Aldrei mælst meiri rigning í fylkinu

Um 43 sentí­metra rigning mældist í sýslunni síðasta sólar­hring, sem er það mesta sem mælst hefur í Tennes­see frá upp­hafi mælinga, átta sentí­metrum meira en þann sólar­hring sem áður var rigninga­mestur. Sá dagur var fyrir 39 árum síðan.

Úr­hellið gerði það fljót­lega að verkum að lækir, sem renna víða við hús og í gegn um ein­hverja bæi í sýslunni, breyttust í straum­hörð fljót.

Veður­fræðingar sáu svo mikla rigningu ekki fyrir en flóða­við­vörun hafði verið send út þar sem varað var við 10 til 15 sentí­metra rigningu. Í versta stormi sem hafði áður mælst á ein­mitt þessu svæði í miðju Tennes­see-fylki hafði ekki mælst nema 23 sentí­metra rigning. Rigningin í gær var næstum tvisvar sinnum meiri.

Veður­fræðingur á svæðinu sem frétta­stofa AP ræddi við segir ó­mögu­legt að komast að því hver þáttur lofts­lags­breytinga af manna­völdum er í svo ofsa­fengnum stormi. Þetta sé þó í þriðja skiptið á einu ári þar sem stór­flóð verður í fylkinu sem hún segir að eðli­legt væri að gera ráð fyrir á um hundrað ára fresti.