„Leit aldrei á þetta þannig að það væri búið að negla einhverja stöðu“

Nú þegar Hannes Þór Halldórsson hefur lagt hanskana á hilluna, eftir að hafa varið mark íslenska landsliðsins í áratug með glæsibrag, er hörð barátta um að taka við sæti hans.

Rúnar Alex lék tvo leiki í undankeppni HM síðasta haust en eftir kveðjuleik Hannesar gegn Þýskalandi tók hinn ungi Elías Rafn Ólafsson við keflinu og lék síðustu fjóra leikina í undankeppninni.

Á þessum tíma var Rúnar Alex ekki að spila með sínu félagsliði en hann hefur nú fest sig í sessi sem aðalmarkvörður OH Leuven í Belgíu, að láni frá Arsenal. Núna er Elías Rafn auk þess meiddur, eftir að hafa handleggsbrotnað, og því ekki með á Spáni. 

Er þá ekki törnin núna tækifærið fyrir Rúnar Alex til að stimpla sig aftur inn sem aðalmarkvörður Íslands?

„Var aldrei búinn að gefa upp vonina“

„Já og nei. Hann stóð sig vel í fyrra en við erum bara að þróa liðið enn þá og ég leit aldrei á þetta þannig að það væri búið að negla einhverja stöðu, þó að hann væri búinn að koma sér í góða stöðu,“ sagði Rúnar Alex við blaðamann í gegnum tölvuna á Spáni í gær.

„Það er svo ógeðslega stutt á milli í fótbolta. Það líða núna fimm mánuðir á milli leikja og margt sem getur breyst á þeim tíma. Ég var aldrei búinn að gefa upp vonina og hef aldrei gefist upp á mínum ferli. Auðvitað er þetta mjög gott tækifæri fyrir mig núna,“ sagði Rúnar Alex.

Auk hans eru þeir Patrik Gunnarsson, markvörður Viking í Noregi, og Ingvar Jónsson, markvörður Íslands- og bikarmeistara Víkings í Reykjavík, í landsliðshópnum núna.

„Við ætlum bara að gera þetta allir saman og reyna að þróa liðið saman. Við þurfum allir að nýta þá sénsa sem við fáum,“ sagði Rúnar Alex.

Íslenska karlalandsliðið í knattspyrnu mætir Finnlandi á laugardaginn í Murcia og hefst leikurinn klukkan fjögur að íslenskum tíma. Liðið mætir svo Spáni í Coruna þriðjudaginn 29. mars og hefst sá leikur klukkan 18:45 að íslenskum tíma. Báðir leikirnir verða í beinni útsendingu á Stöð 2 Sport.