Veður í júlí sjaldan eins skítt

Einar segir að kaldara hafi verið í veðri 2015. Hann rekur síðan ýmsar staðreyndir sem eru sumrinu 2022 ekki í vil. Sólskinsstundir voru heldur færri en að meðaltali í júlí undanfarin árin. Og úrkoma heldur meiri.

„Það sem mér finnast mestu tíðindin frá nýliðnum mánuði í Reykjavík er sú staðreynd að hæsta hámark hita mánaðarins reyndist ekki nema 15,9˚C. Fara þarf aftur til júlí árið 1989 til að finna lægra hæsta hámark. Sá mánuður komst reyndar í sögubækurnar fyrir sólarleysi!“ segir Einar forviða.

Veðurfræðingurinn segir það meira að segja svo að á stöðvum á hálendinu mældust betri dagar en í höfuðborginni.

Þá greinir Einar frá því að á Akureyri hafi hitinn verið í meðallagi sem eru mikil viðbrigði samt frá methita í fyrrasumar.

„Á landsvísu kom varla fyrir nokkur dagur sem kalla mætti hlýjan í júlí og heilt yfir var laugardagurinn 30. júlí sá kaldasti.“