Í­hugar fram­boð til for­seta al­var­lega

Það er greinilegt að Bessastaðir heilla og margir telja sig eiga erindi þangað því verið er að safna meðmælendum fyrir um eða yfir sextíu frambjóðendur til embættis forseta Íslands. Jón Gnarr fyrrverandi borgarstjóri greindi frá framboði sínu með ávarpi í myndbandi í gærkvöldi.

„Ef þjóðin kýs mig til verksins mun ég taka því af mikilli alvöru og leggja mig allan fram um að láta gott af mér leiða í öllu því er varðar heill og hamingju þjóðarinnar í veraldlegum og andlegum efnum. Og bið Guð og menn að gefa mér styrk til þess,“ sagði Jón Gnarr meðal annars í ávarpi sínu.

Þá tilkynnti Guðmundur Felix Grétarsson, sem vakið hefur athygli undanfarin mörg ár fyrir baráttu sína eftir alvarlegt slys og að fá græddar á sig hendur, í morgun að hann bjóði sig fram.

„Í lýðræðisríki þurfa ekki allir að sjá heiminn í sama ljósi en við þurfum að vera samstíga leikreglur, stefnu og gildismat. Við þurfum að skoða hvað er gott í okkar samfélagi og halda í það og sleppa örðu. Það skiptir engu máli á hvaða farrými við ferðumst. Það er öllum til heilla að farartækið hangi saman. Það er af þessum ástæðum sem ég býð mig fram,“ sagði Guðmundur Felix meðal annars í myndbandsávarpi sem hann birti í morgun.

Steinunn Ólína Þorsteinsdóttir leikkona lýsti því yfir á dögunum að hún muni bjóða sig fram ákveði Katrín Jakobsdóttir forsætisráðherra að gera það. Byrjað er að safna meðmælendum með Steinunni Ólínu á island.is en hún hefur ekki tilkynnt formlega um framboð.

Margir bíða hins vegar eftir því að forsætisráðherra greini frá því hvort hún bjóði sig fram eða ekki. Í samtali við fréttastofu segist hún hafa hugsað þessi mál mikið yfir páskana. Hún muni greina frá niðurstöðu sinni á allra næstu dögum. 

Bjóði Katrín sig fram þyrfti að skoða stjórnarsamstarfið í því ljósi. Af þessum sökum boðaði Hildur Sverrisdóttir þingflokksformaður Sjálfstæðisflokksins til sérstaks þingflokksfundar í dag um mögulegt framboð Katrínar.

Það vekur einnig athygli að Bjarni Benediktsson utanríkisráðherra og formaður Sjálfstæðisflokksins mætir ekki á tveggja daga utanríkisráðherrafund Atlantshafsbandalagsins sem hefst í Brussel í dag. Þar á að ræða langtímaaðstoð við Úkraínu og minnast þess að 75 ár eru liðin frá því NATO var stofnað. Ekki er ólíklegt að Bjarni telji sig þurfa að vera heima á Íslandi komi til uppstokkunar í ríkisstjórninni eða annarra breytinga.