Ætlar að hætta áður en Trump rekur hann

Samkvæmt heimildum New York Times vilja Smith og aðrir í teymi hans ljúka vinnu þeirra áður en Trump tekur embætti og er hann sagður vinna að áætlun þar að lútandi.

Smith var skipaður í embætti af Merrick Garlandi, dómsmálaráðherra Joes Biden, og hefur séð um að rannsaka Trump vegna árásarinnar á þinghús Bandaríkjanna þann 6. janúar 2021, þegar stuðningsmenn Trumps ruddu sér leið þar inn með því markmiði að koma í veg fyrir formlega staðfestingu úrslita forsetakosninganna 2020, sem Trump tapaði.

Hann hefur einnig rannsakað Trump vegna skjalamálsins svokallaða, þar sem Trump tók fjölmörg opinber skjöl og þar á meðal leynileg skjöl, úr Hvíta húsinu til Flórída. Lögum samkvæmt hefði hann átt að afhenda Þjóðskjalasafni Bandaríkjanna skjölin.

Smith ákærði Trump á grunni njósnalaga Bandaríkjanna, vegna áðurnefndra leynilegra skjala, sem hann neitaði að skila.

Smith og teymi hans vilja ljúka gerð skýrslu um störf þeirra og ásakanirnar gegn Trump og yrði sú skýrsla svo væntanlega birt opinberlega af dómsmálaráðuneytinu.

Sigur markar endalok málaferla

Starfsreglur dómsmálaráðuneytis Bandaríkjanna segja ekki hægt að sækja sitjandi forseta til saka. Á undanförnum árum hefur Trump varið miklu púðri í að reyna að tefja framgang allra málaferla gegn sér, að virðist með það í huga að verða forseti aftur og komast þannig hjá því að vera dæmdur.

Málaferlin gegn Trump hafa gengið hægt og hafa dómarar, bæði alríkisdómarar og hæstaréttardómarar verið sakaðir um að draga fæturna í umræddum málum.

Sigur Trumps í forsetakosningunum markaði svo í raun endalok á málaferlunum gegn honum, bæði vegna áðurnefndra starfsreglna og sökum þess að hann getur bundið enda á rannsóknirnar sem forseti og skipað dómsmálaráðherra sem gengið getur úr skugga um að málaferlunum sé hætt.

Skýrsla Smiths verður því að lokum endalokin á störfum hans og teymis hans.

Reglur dómsmálaráðuneytisins segja til um að sérstakur saksóknari eigi að gera skýrslu þar sem hann fer yfir rannsókn sína og gerir grein fyrir helstu ákvörðunum sínum.

Samkvæmt heimildum New York Times er óljóst hvenær skýrslan gæti verið tilbúin til birtingar. Einn óvissuþáttur er að starfsmenn leyniþjónusta Bandaríkjanna þurfa að fara yfir skýrsluna og ganga úr skugga um að engar leynilegar upplýsingar séu birtar.

Ætla líklega að rannsaka rannsóknina

Trump-liðar og þar á meðal þingmenn Repúblikanaflokksins, hafa lengi sakað Smith um að vera hluti af herferð Demókrata gegn Trump og að dómsmálaráðuneytinu hafi verið beitt gegn honum. Þingmenn hafa heitið því að rannsaka rannsókn Smiths ítarlega og Trump sjálfur hefur áður heitið því að refsa meintum andstæðingum sínum, meðal annars með því að beita dómsmálaráðuneytinu gegn þeim.

Af dómsmálunum gegn Trump hefur hann verið sakfelldur í einu þeirra. Það var í hinu svokallaða þagnargreiðslumáli og var hann dæmdur fyrir að falsa skjöl til þess að hylma yfir greiðslur til klámstjörnu fyrir forsetakosningarnar 2016.

Dómsuppkvaðning hefur ekki farið fram en Juan Merchan, dómarinn í málinu, sagði í gær að verjendur Trumps og saksóknarar hafi viku til að ræða næstu skref í málinu, þar sem endurkjör Trumps vekur ýmsar spurningar um mögulega refsingu hans.

Merchan átti í gær að ákveða hvort sakfelling Trumps yrði felld niður vegna nýs úrskurðar Hæstaréttar Bandaríkjanna um að friðhelgi forseta. Því var frestað til 19. nóvember.

Sjá einnig: Hæstiréttur segir Trump njóta friðhelgi að hluta

Málið gegn Trump í Georgíu er enn í dvala vegna deilna um stöðu Fani Willis, saksóknara Fulton-sýslu, og eins og áður hefur komið fram var skjalamálinu vísað frá. Því er útlit fyrir að Trump muni alfarið sleppa við refsingar í öllum málunum fjórum.