Júlíus tryggði Fredrikstad bikarmeistaratitilinn

Leikurinn fór fram á Ullevaal í Osló, þjóðarleikvangi Norðmanna. Í deildinni endaði Molde í 6. sæti, einu stigi og sæti ofar en Fredrikstad.

Molde var hættulegri aðilinn í leiknum og kom fimm skotum á mark Fredrikstad en ekkert þeirra rataði inn. Fredrikstad sá örlítið meira af boltanum en skapaði fá marktækifæri.

Leiknum lauk því með markalausu jafntefli og haldið var í framlengingu, sem dugði ekki heldur til að skilja liðin að og því var farið í vítaspyrnukeppni.

Eirik Haugan klúðraði fyrsta víti Molde. Allir aðrir leikmenn skoruðu úr sínum spyrnum, Júlíus Magnússon tók síðustu spyrnu Fredrikstad og tryggði þeim titilinn.

Þetta var fyrsti bikarmeistaratitill Fredrikstad síðan 2006 og sá tólfti í sögu félagsins, sem hefur verið á góðu flugi undanfarið eftir mikla lægð árin áður.