Sjáðu mark Glódísar í bikarsigrinum

Töluverð eftirvænting var fyrir leik gærdagsins í Munchen en Bayern og Frankfurt eru jöfn að stigum á toppi þýsku úrvalsdeildarinnar. Það mátti búast við jöfnum leik, sem úr varð.

Frankfurt komst yfir á 80. mínútu vegna sjálfsmarks Carly Simon og stefndi í að Bæjarar myndu falla úr leik. Serbneski framherjinn Jovana Damjanovic kom til bjargar á 90. mínútu og leikurinn því framlengdur.

Glódís Perla kom Bayern svo yfir strax á þriðju mínútu framlengingarinnar með fagmannlegri og framherjalegri vinstri fótar afgreiðslu eftir fyrirgjöf frá vinstri. Japanska landsliðskonan Momoko Tanikawa skoraði þriðja mark Bayern áður en Damjanovic gerði út um leikinn með sínu öðru marki.

Bayern er því komið í undanúrslit bikarkeppninnar og freistar þess að vinna hana í fyrsta skipti síðan árið 2012. Wolfsburg hefur einokað bikartitilinn undanfarin ár en Sveindís Jane Jónsdóttir spilaði með liðinu er það tapaði óvænt fyrir Hoffenheim í gær.

Þá féll Karólína Lea Vilhjálmsdóttir einnig úr keppni en lið hennar Leverkusen tapaði einnig óvænt á heimavelli fyrir Werder Bremen.

Mörkin úr leik Bayern og Frankfurt má sjá í spilaranum að ofan.