Kennari mun ekki hlýða snjallsíma­banni í skólum

„Fari svo að þú komir í gegn um Alþingi banni við að 13-16 ára ungmenni í grunnskólum hafi með sér snjallsíma í skólann mun ég ekki framfylgja því,“ segir Ragnar Þór í færslu sem hefur vakið þó nokkra athygli á Facebook.

Ljóst er að Ragnar telur þetta bann vanhugsað og í raun glórulaust. Hann veit ekki hvernig á að framfylgja þessu banni:

„Ég mun ekki krefjast þess að nemendur afhendi mér eða öðrum eigur sínar. Ég mun ekki krefjast þess að þeir taki af sér snjallúr. Ég mun ekki kíkja inn í eyrun á þeim og fjarlægja þaðan heyrnartól sem þeir geta notað til að hlusta á og tala við símann sinn þótt hann sé í töskunni. Ég mun ekki reyna að grípa nemendur glóðvolga í símanum í frímínútum eða í skúmaskotum. Ég mun ekki hlýða.“

Ragnar Þór segir að það megi hóta sér áminningum og brottrekstri, hann muni samt ekki hlýða. Þó sé hann löghlýðinn maður.

„Ég mun ekki hlýða þér vegna þess að þú hefur lýst því yfir að þú sért tilbúin að fara yfir strik. Strik sem enginn hér á landi hefur stigið yfir, nema hafa nánast um leið lýst yfir fyrirlitningu á kennurum og þeirra störfum. Strik sem verið er að stíga yfir í ótal löndum um þessar mundir. Það eru fylki í Bandaríkjunum sem hafa gefið skóla á vald forneskju. Þar er verið að hreinsa út kerfisbundið alla innviði sem tryggja börnum, óháð búsetu og bakgrunni, aðgang að gæðamenntun. Þróunarkenningunni er úthýst, hinsegin fræðslu er úthýst, kynfræðslu er úthýst,“ segir Ragnar Þór meðal annars í færslu sinni.