Sjáðu tví­sparkið ör­lagaríka í Madrídarslagnum

Real Madrid vann fyrri leikinn, 2-1, en það tók Atlético aðeins 27 sekúndur að jafna í leiknum í gær. Conor Gallagher skoraði þá.

Fleiri urðu mörkin ekki í venjulegum leiktíma né framlengingu og því réðust úrslitin í vítakeppni.

Skorað var úr fyrstu þremur spyrnunum í vítakeppninni. Alvarez steig næstur fram og skoraði þrátt fyrir að renna er hann spyrnti boltanum. 

Stuðningsmenn Atlético fögnuðu en ský dró fyrir sólu þegar Szymon Marciniak gaf til kynna að markið hefði verið dæmt af í VAR-herberginu þar sem Alvarez hefði snert boltann tvisvar þegar hann skaut að marki.

Real Madrid skoraði svo úr tveimur af næstu þremur spyrnum sínum og tryggði sér sæti í átta liða úrslitum Meistaradeildarinnar. Liðið getur því enn unnið keppnina í sextánda sinn.

Í spilaranum hér fyrir neðan má sjá markið úr leik Atlético og Real sem og vítaspyrnuna sem Vinícius Júnior klúðraði í venjulegum leiktíma og vítakeppnina í heild sinni.