Bensínbrúsar inni í í­búðinni

Allt tiltækt slökkvilið var kallað út í gærmorgun vegna eldsvoða í kjallaraíbúð á Hjarðarhaga í Vesturbæ Reykjavíkur. Þar bjuggu fjórir karlmenn sem leigðu herbergi í íbúðinni en einn þeirra var farinn í vinnuna þegar eldurinn kom upp. Þrír voru inni og komst einn þeirra út um glugga. Hinir tveir eru látnir.

„Annar þeirra var frá Bandaríkjunum og á sextugsaldri og hinn var frá Tékklandi á fertugsaldri. Báðir höfðu þeir búið hér á landi í nokkur ár,“ segir Ævar Pálmi Ævarsson, aðstoðaryfirlögregluþjónn hjá lögreglunni á höfuðborgarsvæðinu, og bætir við að þeir tengist einungis í gegnum það að vera samleigjendur.

Sá þriðji er þungt haldinn.

„Hann er mikið slasaður og mun líklegast þurfa að liggja á sjúkrahúsi í nokkra daga í viðbót.“

Ævar segir ekki tímabært að tjá sig um eldsupptök. Rannsókn stendur yfir og beinist meðal annars að því hvort eitthvað saknæmt hafi átt sér stað.

Er grunur um slíkt? 

„Ég get ekki tjáð mig um það að svo stöddu, það er eitt af því sem er til rannsóknar, það er hvort eldurinn hafi kviknað eða verið kveiktur og þá með saknæmum hætti.“

Er eitthvað sem bendir til þess? 

„Ég get ekki tjáð mig um það.“

Lögregla hefur tekið skýrslu af nokkrum aðilum. „Bæði af þeim sem lentu í brunanum og vitnum og íbúum í húsinu,“ segir Ævar.

Slökkvilið hefur talað um að mikill eldur hafi verið í íbúðinni og samkvæmt heimildum fréttastofu voru bensínbrúsar þar inni. Nágrannar lýstu því að hafa heyrt sprengingu í tengslum við eldsvoðann.

Er eitthvað sem bendir til þess að hafi verið fíkniefnaframleiðsla í íbúðinni, eða eitthvað slíkt?

„Nei, það er ekkert sem bendir til þess.“

Rannsóknin sé umfangsmikil og muni taka tíma.

Heldurðu að það verði farið fram á gæsluvarðhald yfir einhverjum? 

„Nei ég á ekki von á því,“ segir Ævar.