Náðar spilltan fógeta

Scott Jenkins, var fógeti í Culpepersýslu í Virginíu. Hann var dæmdur fyrir svik og mútuþægni í mars og dæmdur til tíu ára fangelsisvistar. Hann var meðal annars dæmdur fyrir að gera auðuga menn að fógetafulltrúum í skiptum fyrir reiðufé en í heild var hann dæmdur til að taka við mútum frá átta aðilum.

Hann tók við rúmlega 75 þúsundum dala í mútur. Það samsvarar um 9,5 milljónum króna.

Jenkins gerði tvo útsendara Alríkislögreglu Bandaríkjanna (FBI) að fógetafulltrúum fyrir fimm þúsund dali annars vegar og tíu þúsund dali hins vegar. Þá sagði athafnamaður frá Virginíu frá því í dómsal að Jenkins hefði hjálpað honum að endurheimta byssuleyfi sitt og svo gert hann að fógetafulltrúa í skiptum fyrir tugi þúsunda dala í reiðufé og lán sem aldrei voru endurgreidd.

Hann átti að hefja afplánun sína í dag, þriðjudag.

Í síðasta mánuði sagði Jenkins á viðburði á vegum samtaka fógeta, samkvæmt frétt BBC, að hann væri viss um að Trump myndi hjálpa honum, ef hann fengi að segja forsetanum sögu sína.

„Spillt“ dómsmálaráðuneyti

Trump sagði frá náðuninni á samfélagsmiðli hans í gær og sagði hann að „spillt og vopnvætt“ dómsmálaráðuneyti Joes Biden hefði dregið Jenkins og fjölskyldu hans gegnum svaðið. Jenkins væri yndislegur maður sem hefði verið ofsóttur af öfgamönnum.

Hann hélt því einnig fram að dómari málsins hafi meinað Jenkins að leggja fram sönnunargögn sem hefðu leitt til sýknu.

Trump á í stirðu sambandi við dómskerfi Bandaríkjanna um þessar mundir en dómarar hafa ítrekað staðið í vegi áætlana hans og þá sérstaklega hvað varðar brottflutning meints flótta- og farandfólks úr landi.

Sjá einnig: Vilja leggja réttarríkið til hliðar

Bandamenn Trumps og ráðgjafar hafa ítrekað kallað eftir því að dómurum verði velt úr sessi eða að ríkisstjórnin fari ekki eftir úrskurði þeirra.

Í færslu sinni frá því í gær skrifaði Trump að eins og þekkt væri hefðu öfgafullir dómarar ekki að fylgja lögunum heldur eigin geðþótta. Fógetinn væri fórnarlamb þessa kerfis og að hann myndi ekki verja einum degi í fangelsi.

Þessi í stað myndi Jenkins, sem er 53 ára gamall, eiga yndislegt og afkastamikla ævi.

Umfangsmiklar náðanir stuðningsmanna

Trump hefur ítrekað náðað stuðningsmenn sína. Í síðasta mánuði náðaði hann Repúblikana frá Nevada sem hafði notað fjármuni sem áttu að fara í styttu af lögregluþjóni sem féll við störf í persónulegum tilgangi. Hún notaði peningana meðal annars í lýtalækningar.

Í janúar náðaði hann svo Ross Ulbricht, stofnanda vefsins Silk Road, þar sem ólöglegur varningur eins og fíkniefni og vopn gengu kaupum og sölum um langt skeið. Hann var sakfelldur fyrir fíkniefnasölu og peningasölu.

Hann var einnig sakaður um að hafa lagt á ráðin um sex launmorð en það tókst ekki að sanna þær ásakanir.

Þegar Trump tilkynnti náðun Ulbricht sagði hann „úrþvættin“ sem hafi farið gegn sér á árum áður.

Þá hefur Trump náðað Rod Blagojevich, fyrrverandi ríkisstjóra Illinois, sem var dæmdur fyrir að reyna að selja öldungadeildarsæti Baracks Obama.

Auk þess að hafa náðað pólitíska bandamenn, fyrrverandi starfsmenn og stríðsglæpamenn á árum áður náðaði Trump einnig, eins og frægt er, alla þá sem tóku þátt í árásinni á þinghús Bandaríkjanna í janúar 2021.

Þar á meðal eru menn sem dæmdir voru fyrir að ráðast á lögregluþjóna og meðlimir Proud boys og Oath keepers hópanna svokölluðu, sem voru meðal annars dæmdir fyrir uppreisnaráróður.