Réttað yfir sakhæfum Ym fyrir luktum dyrum

Í ákæru á hendur Ym segir að hann hafi veist að móður sinni, á heimili hennar í Breiðholti, og banað henni með því að stinga hana í það minnsta 22 sinnum með hnífi í brjóstsvæði, handleggi og hendur. Hnífstungurnar hafi meðal annars gengið inn í hægra lunga, sem hafi leitt til dauða hennar.

Aðalmeðferð í málinu hefst klukkan 09:15 í dag og stendur til klukkan 16. Karl Ingi Vilbergsson, sem sækir málið fyrir Héraðssaksóknara, segir í samtali við Vísi að málið verði háð fyrir luktum dyrum. Samkvæmt lögum um meðferð sakamála skulu þinghöld háð í heyranda hljóði en dómari getur þó ákveðið, að eigin frumkvæði eða eftir kröfu ákæranda, sakbornings eða brotaþola, að þinghald fari fram fyrir luktum dyrum, telji hann það nauðsynlegt.

Karl Ingi segir að geðmat hafi verið framkvæmt á Ym í málinu og niðurstaða yfirmatsmanna hafi verið að Ymur hafi verið sakhæfur á verknaðarstundu en refsing yfir honum myndi ekki bera árangur.

Tveir geðlæknar hafi framkvæmt matið og dómurinn verði skipaður tveimur embættisdómurum og einum geðlækni.