Sendir her­skipa­flota að Íran og hótar „of­beldi“

Donald Trump Bandaríkjaforseti skrifaði hótanir sínar í færslu á persónulegum samfélagsmiðli í dag. Sagði hann herskipaflotann sigla „hratt, með miklum krafti, áhuga og staðfestu“ í átt að Íran.

„Vonandi kemur Íran fljótt „að borðinu“ og gerir sanngjarnt og réttlátt samkomulag — ENGIN KJARNORKUVOPN,“ skrifaði forsetinn. 

Flotinn væri stærri en sá sem stjórn hans hefði sent að Venesúela sem Bandaríkjastjórn heldur nú í herkví. Hann væri tilbúinn að beita ofbeldi til þess að ná markmiðum hans.

Vísaði forsetinn svo til loftárása Bandaríkjamanna á kjarnorkustöðvar í Íran í fyrra.

„Næsta árás verður miklu verri. Ekki láta það gerast aftur,“ skrifaði forsetinn sem er afar ósáttur við að hafa ekki hlotið friðarverðlaun Nóbels í fyrra.

Svo virðist sem að bandaríska flugmóðurskipið Abraham Lincoln sé komið til Miðausturlanda. Heimildir breska ríkisútvarpsins innan bandaríska varnarmálaráðuneytisins herma að skipið sigli fremst í herskipaflota þar.

Sendinefnd Írans hjá Sameinuðu þjóðunum brást við hótunum með því að segja að stjórnvöld í Teheran væru tilbúin til viðræðna sem byggðust á gagnkvæmri virðingu og hagsmunum. Þau væru aftur á móti tilbúin að verja sig „sem aldrei fyrr“ ef þeim væri ógnað.