Ó­væntur stór­sigur í Texas hringir bjöllum hjá Repúblikönum

Umrætt þingsæti hafði verið í höndum Repúblikana í áratugi en Kelly Hancock, sem hafði setið í því í fjögur kjörtímabil, hætti nýverið.

Leigh Wambsganss, frambjóðandi Repúblikanaflokksins, varði mun meira af peningum í kosningabaráttuna en Rehmet og þar að auki hafði Donald Trump sigrað í kjördæminu í forsetakosningunum 2024 með sautján prósentustigum.

Rehmet bar þó sigur úr bítum með fjórtán prósentustiga mun, 57 prósent gegn 43.

Sigurinn hefur vakið mikla athygli og fylgir hann á hæla sambærilegra úrslita fyrir Demókrata víða um Bandaríkin á undanförnum mánuðum.

Samkvæmt frétt Texas Tribune varði Rehmet um sjötíu þúsund dölum í kosningabaráttuna en Wambsganss varði um 736 þúsund dölum. Báðir frambjóðendur nutu þó stuðnings annarra aðila sem vörðu einnig fúlgum fjár í baráttuna.

Þvoði hendur sínar af kosningunum

Þegar Trump var spurður út í úrslitin í gær sagðist hann ekkert vita um þessar kosningar og að þær kæmu honum í raun ekkert við. Degi áður hafði hann ausið lofi yfir Wambsgangss á samfélagsmiðli sínum og lýst henni sem frábærum frambjóðanda sem nyti fulls stuðnings síns.

Í annarri færslu sem hann birti á laugardaginn hvatti hann íbúa í Texas til að greiða Wambsganss atkvæði og sagði hana mikinn stuðningsmann MAGA-hreyfingarinnar.

Wambsganss sagði í yfirlýsingu eftir að úrslitin voru ljós að úrslitin ættu að vekja athygli innan Repúblikanaflokksins. Hún sagði þó einnig að niðurstaðan verði allt önnur þegar hún og Rehmet munu berjast aftur um þingsætið í kosningunum í nóvember. Þá verði kjörsókn meðal kjósenda Repúblikanaflokksins betri.

AP fréttaveitan hefur eftir Dan Patrick, aðstoðarríkisstjóra Texas, að kosningarnar ættu að hringja viðvörunarbjöllum hjá Repúblikönum í ríkinu, þar sem þeir stjórna miklum meirihluta opinberra embætta. Demókrati hefur ekki unnið kosningar um embætti þar sem allir íbúar Texas fá að kjósa um frá árinu 1994.

Patrick sagði að kosningar sem þessar væru alltaf óútreiknanlegar, þar sem kjörsókn væri oft lítil og sagðist hann sannfærður um að Repúblikanar myndu taka sætið aftur í þingkosningunum í nóvember.

Texas Tribune segir að í aðdraganda kosninganna á laugardaginn hafi Patrick farið mikinn í að reyna að hvetja kjósendur til að mæta á kjörstað.

Repúblikanar með áhyggjur

Þessi kosning er þó ein margra sérstakra kosninga á undanförnu ári, þar sem Demókratar hafa staðið sig mun betur en búist var við. Þeir hafa unnið óvænta sigra víðsvegar um Bandaríkin og í mörgum tilfellum í ríkjum og kjördæmum þar sem Repúblikönum hefur iðulega vegnað betur í gegnum árin.

Þetta hefur valdið áhyggjum innan Repúblikanaflokksins og þá sérstaklega hvað varðar fulltrúadeild Bandaríkjaþings, þar sem Repúblikanar eru með mjög nauman meirihluta.

Donald Trump og aðrir leiðtogar Repúblikanaflokksins hafa þrýst á ráðamenn í ríkjum þar sem Repúblikanar eru með völd til að breyta kjördæmum ríkjanna með því markmiði að fækka kjördæmum þar sem Demókratar eiga séns á að ná kjöri.

Það að breyta kjördæmum með þessum hætti, í hag annars flokksins í Bandaríkjunum, kallast „Gerrymandering“ á ensku. Í einföldu máli sagt er þetta gert með því að þjappa mörgum kjósendum eins flokks í fá kjördæmi og þynna út atkvæði annarra. Til dæmis er það gert með því að skera borgir í litlar sneiðar og gera þær að hluta af stærri svæðum þar sem kjósendur Repúblikanaflokksins eru fleiri.

Demókratar hafa brugðist við þessum aðgerðum Repúblikana með eigin breytingum á kjördæmum í ríkjum eins og Kaliforníu, þar sem Demókratar stjórna.

Sjá einnig: Stefnir í kjördæmastríð í Bandaríkjunum?

Trump sagði á dögunum að ef Demókratar nái meirihluta í fulltrúadeildinni muni þeir líklega gera sitt besta til að ákæra hann aftur fyrir embættisbrot.

Þegar Trump ávarpaði Repúblikana í upphafi árs hóf hann ræðu sína á að spyrja þingmenn hvað væri eiginlega að gerast í hausnum á kjósendum.

„Ég óska þess að þið gætuð útskýrt fyrir mér hver fjandinn er að gerast í hugum almennings. Því við erum með réttu stefnumálin, ekki þeir. Þeir eru með hræðileg stefnumál.“

Seinna í ávarpinu sneri hann sér aftur að kosningunum og lýsti yfir furðu sinni á því að Repúblikanar þyrftu yfir höfuð að eiga í kosningabaráttu við Demókrata. Þá talaði hann um það að hætta við kosningarnar í nóvember.

„Ég ætla ekki að segja hættum við kosningarnar, þeir ættu að hætta við kosningarnar. Því þá segja fölsku fjölmiðlarnir: „Hann vill hætta við kosningarnar. Hann er einræðisherra“. Þeir kalla mig alltaf einræðisherra.“

Enn seinna í ræðunni sagði Trump að Repúblikanar yrðu að taka pólitíkina alvarlega. Ef þeir héldu ekki meirihluta þeirra á þingi myndu Bandaríkin fara til andskotans.