75 prósent tapleikja á síðustu tveimur stórmótum á móti Degi Sig

Óskar Ófeigur Jónsson skrifar 2. febrúar 2026 11:01

Dagur Sigurðsson hefur unnið alla þrjá leikina á móti Íslandi á síðustu tveimur stórmótum sem sá til þess að hann vann silfur á HM í fyrra og brons á EM í ár. EPA/Henning Bagger/Thomas Traasdahl

Dagur Sigurðsson vann verðlaun á öðru stórmótinu í röð þegar Króatar tryggðu sér bronsverðlaun á Evrópumótinu í handbolta með sigri á Íslendingum í gær. Dagur virðist vera orðinn algjört „kryptonite“ fyrir íslenska landsliðsþjálfarann Snorra Stein Guðjónsson.

Króatar unnu eins marks sigur á Íslandi í leiknum um bronsið og þetta var annar sigur Króata á íslenska landsliðinu á þessu móti. Krótar unnu einnig Ísland í fyrsta leik liðanna í milliriðlinum. Báðir leikirnir unnust með aðeins einu marki.

Ísland tapaði aðeins þremur leikjum á þessu Evrópumóti en þriðja tapið kom í undanúrslitaleiknum á móti verðandi Evrópumeisturum Dana.

Íslenska landsliðið tapaði líka aðeins einum leik á heimsmeistaramótinu í fyrra en það tap kom einmitt á móti Degi Sigurðssyni og lærisveinum hans í Króatíu. Það tap var afar dýrkeypt en íslenska liðið hafnaði aðeins í níunda sæti mótsins þrátt fyrir að vinna fimm af sex leikjum sínum.

Íslensku strákarnir hafa því aðeins tapað fjórum leikjum af fimmtán á síðustu tveimur stórmótum sínum undir stjórn Snorra Steins Guðjónssonar. Tíu leikjanna hafa unnist og einn endaði með jafntefli.

Um leið þýðir það að 75 prósent tapleikja íslenska handboltalandsliðsins á síðustu tveimur stórmótum voru á móti Degi Sigurssyni.