Friðarsamkomulag verði undir­ritað á morgun

AP-fréttaveitan greinir frá þessu og segir að fulltrúar Íran hafi sjaldan gefið út jafn bjartsýnar yfirlýsingar. Einungis tveir dagar eru síðan Trump hótaði að gera öflugar árásir á Íran og hernema Kharg-eyju. Þeim árásum var síðan aflýst sama dag. Átök milli þjóðanna með tilheyrandi lokun Hormússunds og loftárásum Bandaríkjahers hafa staðið yfir síðan í lok febrúar.

Trump hefur sagt að hið mikilvæga Hormússund verði opnað strax eftir undirritun friðarsamkomulags. Shehbaz Sharif, forsætisráðherra Pakistans, sagði fyrr í dag að gert væri ráð fyrir að samkomulag yrði frágengið á næstu 24 klukkustundum. Utanríkisráðuneyti Pakistans sagði jafnframt að fyrirhuguð undirritunarathöfn væri áætluð á morgun, sunnudag, en veitti ekki frekari upplýsingar.

Á sama tíma hafði ríkismiðill eftir Esmail Baghaei, talsmanni íranska utanríkisráðuneytisins, að undirritunin „muni ekki eiga sér stað á morgun“, en „líkurnar á því að gengið verði frá viljayfirlýsingu á næstu dögum séu miklar“.

Brothætt vopnahlé hefur verið í gildi í Íran frá 7. apríl og ríkin skipst á árásum. Á síðustu vikum hefur Trump ítrekað fullyrt að stjórnvöld væru nálægt samkomulagi.

Íran hefur sýnt varfærni í samningaviðræðunum og bent á að fyrri viðræður við Bandaríkin sem fóru fram á síðasta ári og í byrjun þessa árs hafi ekki komið í veg fyrir árásir Bandaríkjanna og Ísraels.

Vilborg Ása Guðjónsdóttir alþjóðastjórnmálafræðingur sagði fyrr í dag langt frá því að friður væri í augnsýn á milli Bandaríkjanna og Íran þrátt fyrir drög að samkomulagi.

Trump muni ræða jarðsprengjuhreinsun í Hormússundi

AP segir gert ráð fyrir að Trump muni ræða jarðsprengjuhreinsun í Hormússundi á leiðtogafundi G7-ríkjanna sem hefst á mánudag.

Nafnlaus háttsettur bandarískur embættismaður sagði að Trump hygðist funda með leiðtogum Egyptalands, Katar og Sameinuðu arabísku furstadæmanna þar til að ræða leiðir til að binda enda á stríðið. G7-ríkin Bretland og Frakkland hafa lýst yfir áhuga á því að aðstoða við jarðsprengjuhreinsun þegar átökum linnir.

Íran hefur meira og minna stjórnað umferð um Hormússund frá því að stríðið hófst og nánast stöðvað olíu- og jarðgasflutninga frá Persaflóa. Bandaríkin hafa brugðist við með því að setja íranskar hafnir í herkví og þannig reynt að auka þrýstinginn á íranskan efnahag með því að koma í veg fyrir útflutning.

Kjarnorkumálið sagt enn óleyst

Talsmaður íranska utanríkisráðuneytisins sagði að viljayfirlýsingin sem væri til umræðu snerist um að binda enda á stríðið og á þessu stigi hefði verið ákveðið að engin umræða færi fram um úranbirgðir Írans.

Kjarnorkuáætlun landsins og auðgað úran hefur lengi verið eitt helsta deiluefni stjórnvalda við Bandaríkin og Ísrael.

Trump fullyrti á samfélagsmiðlum að „þegar allt er orðið rólegt“ myndu Bandaríkin fara inn og „þynna út og eyða“ auðgaða úraninu innan landamæra Íran eða í Bandaríkjunum.

AP-fréttaveitan segir að hreyfing hafi komist í viðræður ríkjanna eftir að Íran skiptist á árásum við Bandaríkin og Ísrael fyrr í þessari viku. Hótuðu stjórnvöld að binda enda á vopnahléið og steypa Miðausturlöndum aftur í allsherjarstríð.

Abbas Araghchi, utanríkisráðherra Írans, birti í gær færslu á X, áður Twitter, þar sem hann sagði að „það hafi aldrei verið jafn stutt“ í samkomulag. Trump fullyrti á fimmtudag að verulegur árangur hefði náðst í samningaviðræðum, einungis klukkustundum eftir að hann hótaði að taka yfir olíuiðnað Írans.