Skipuð skóla­meistari eftir storminn á Bif­röst

Málið átti eftir að reynast umdeilt og lýsti Félag akademískra starfsmanna við Háskólann á Bifröst yfir vantrausti á stjórnsýslu Margrétar. Starfsmenn sögðu starfsumhverfið þrúgandi og að réttlætiskennd fólks væri misboðið.

Bentu gögn til að Margrét, auk deildarstjóra og rannsóknarstjóra við skólann, hefðu notað gervigreindarmállíkan til að meta réttmæti höfundarstöðu á vísindagreinum hjá starfsmönnunum þremur. Einn þeirra líkti kærunni við „faglega aftöku.“

Siðanefnd skólans átti síðar eftir að hreinsa starfsmennina þrjá af sök en nemendur gagnrýndu sömuleiðis stjórn skólans. 

Guðrún Hrefna Guðmundsdóttir er fráfarandi skólameistari Fjölbrautaskólans í Breiðholti en hún hefur gegnt embættinu í sautján ár.

Sex aðrir sóttu um

Margrét er skipuð í embætti skólameistara Fjölbrautarskólans í Breiðholti frá 1. ágúst til fimm ára. Greint er frá þessu í tilkynningu frá Stjórnarráðinu. Alls sóttu sjö um stöðuna og voru umsækjendur eftirfarandi:

• Elvar Jónsson, leiðtogi farsældar barna
• Guðmundur Stefán Gunnarsson, kennari og íþróttafræðingur
• Harpa Jörundardóttir, framhaldsskólakennari og sérfræðingur
• Hrafnhildur Hafberg, framhaldsskólakennari, alþjóðafulltrúi og kynningarstjóri
• Margrét Jónsdóttir Njarðvík, fyrrverandi rektor
• Nanna Kristjana Traustadóttir, sérfræðingur
• Víðir Stefánsson, aðstoðarskólameistari

Starfað lengi hjá HR og HÍ

Áður en Margrét tók við stöðu rektors var hún í átta ár hjá Háskólanum í Reykjavík (HR) sem lektor, dósent og forstöðumaður alþjóðasviðs. Þá starfaði hún í tæp átta ár sem lektor og skorarformaður í Háskóla Íslands (HÍ) auk þess að hafa kennt spænsku við Kvennaskólann í Reykjavík, Menntaskólann í Reykjavík og Verzlunarskóla Íslands. 

Margrét er með MBA-gráðu í stjórnun frá Háskólanum í Reykjavík auk doktorsgráðu í spænsku máli og bókmenntum frá Princeton University. Hún er með kennsluréttindi og lauk grunnnámi í spænsku við Háskóla Íslands.

Fréttin hefur verið uppfærð.