Yfir­lýsing UEFA: Óskiljan­leg á­kvörðun sem grefur undan trúverðug­leika HM

„Við lýsum yfir vantrú okkar á slíkri fordæmalausri, óskiljanlegri og óréttlætanlegri ákvörðun,“ segir í niðurlagi yfirlýsingarinnar frá UEFA í dag.

Eins og fjallað var um í gær þá fær Balogun að spila gegn Belgíu í kvöld, í 16-liða úrslitum HM, en virtir miðlar á borð við Reuters, BBC og AFP segja FIFA hafa tekið þessa ákvörðun eftir að Donald Trump Bandaríkjaforseti hafði samband við vin sinn Gianni Infantino, forseta FIFA.

Leikbann Baloguns var gert skilorðsbundið til eins árs sem gerir honum kleift að spila í kvöld.

Belgar voru fljótir að senda frá sér yfirlýsingu vegna málsins og blöskrar ákvörðunin enda hefur það aðeins einu sinni áður gerst í sögu HM, þar sem 189 rauð spjöld hafa verið gefin, að leikmaður sleppur við leikbann. Það var þegar Brasilíumaðurinn Garrincha slapp við bann árið 1962, sem sömuleiðis var harðlega gagnrýnt, en á þeim tíma voru ekki reglur um sjálfkrafa leikbann vegna rauðs spjalds, líkt og í dag.

UEFA segir ákvörðun FIFA ekki standast neina skoðun. Stundum sé hægt að túlka reglur með mismunandi hætti en ekki í þessu tilfelli. Rauðu spjaldi fylgi sjálfkrafa eins leiks bann og á því sé ekki hægt að gera undantekningar, hvað þá allt í einu á miðju heimsmeistaramóti. Með þessu sé búið að fara yfir strikið, grafa undan trúverðugleika HM og stefna heilindum íþróttarinnar í hættu.

Yfirlýsing UEFA í heild sinni:

Ákvörðun gærdagsins um að fresta framkvæmd sjálfkrafa eins leiks banns í eitt ár, í kjölfar rauða spjaldsins sem leikmaðurinn Folarin Balogun fékk, fór yfir strikið.

Knattspyrna, líkt og aðrar íþróttir, byggir á reglum sem eru grundvöllur sanngjarnrar, heiðarlegrar og gagnsærrar keppni. Stundum eru reglur opnar fyrir túlkun. Í þessu tilfelli ekki. Sjálfkrafa lágmarksbann í einn leik í kjölfar rauðs spjalds er ekki valkvæður kostur og krefst ekki ákvörðunar þar til bærra aðila til að taka gildi. Það er meginregla sem er greypt í reglugerðir og getur ekki verið háð undantekningum, hvað þá í miðju móti þar sem nokkrir aðrir leikmenn hafa verið í sömu stöðu og tekið út bann sitt samkvæmt reglum.

Þegar verndarar reglnanna tryggja ekki lengur öryggi þeirra er heilindum leiksins stefnt í hættu og trúverðugleiki keppninnar grafinn undan. Slík ákvörðun skapar jafnframt fordæmi í yfirstandandi móti, þar sem svipuð tilvik munu nú krefjast jafnrar meðferðar, keppninni til tjóns.

Knattspyrna er ástsælasta íþrótt í heimi vegna þess að hún er fallegur leikur og nýtur trausts vegna þess að hún er spiluð alls staðar eftir sömu lögmálum. Mót er aldrei algjörlega sjálfstætt og ef um heimsmeistaramót er að ræða hefur það vald til að hafa jákvæðar eða neikvæðar afleiðingar fyrir leikinn í heild sinni.

Við lýsum yfir vantrú okkar á slíkri fordæmalausri, óskiljanlegri og óréttlætanlegri ákvörðun.