„Á­nægður með það hvernig strákarnir héldu á­fram að trúa“

Sölvi Geir Ottesen var stoltur af frammistöðu sinna manna og þeirri baráttu sem þeir sýndu gegn Thun en um leið svekktur yfir því að Víkingar skyldu ekki ná að snúa einvíginu við og tryggja sér sæti í umspili Evrópudeildarinnar.

„Við fengum á okkur tvö mörk sem við ætluðum ekki að fá á okkur. Þessi þrjú sem við skoruðum hefðu dugað okkur í framlengingu. Það er bara þannig að við getum ekki fengið á okkur fimm mörk á þessu stigi og ætlast til þess að komast áfram,“ sagði Sölvi Geir Ottesen, þjálfari Víkings, aðspurður út í leikinn.

Sölvi lýsir þó mikilli ánægju með viðbrögð leikmanna Víkings. Víkingar lentu tvívegis undir í leiknum en svöruðu í bæði skiptin og neituðu að missa trúna og leggja árar í bát.

„Við lentum tvisvar sinnum undir í þessum leik og gáfumst aldrei upp. Við héldum í trúna og ég er virkilega ánægður með það hvernig strákarnir héldu áfram að trúa.“

Sölvi taldi Víkinga hafa verið nokkuð óheppna með að hafa ekki náð inn fjórða markinu undir lok leiksins.

„Við vorum í rauninni bara óheppnir að skora ekki í lokin og koma leiknum í 4-2 og búa til alvöru stemningu og spennu hérna undir lokin. Ég er virkilega ánægður með frammistöðuna og okkur.“

Víkingar eru úr leik í undankeppni Evrópudeildarinnar en þó heldur Evrópuævintýrið áfram í umspili fyrir Sambandsdeildina. Sölvi segir að markmið Víkinga séu skýr og óbreytt.

„Það er markmiðið okkar að komast áfram í Evrópu og inn í deildarkeppnina. Það breytist ekkert núna.“

Aðspurður um muninn á leikjunum tveimur sagði Sölvi Víkinga hafa verið mun betur í stakk búna til að takast á við leikstíl svissnesku meistaranna í kvöld. Hann viðurkenndi jafnframt að uppleggið í fyrri leiknum hefði mögulega ekki verið það rétta.

„Við réðum betur við þeirra leikstíl í dag. Við breyttum um kerfi. Það voru kannski mistök að fara í það kerfi sem við fórum í úti í Sviss. Núna vissum við nokkurn veginn hverju við værum að mæta.“

Sölvi segir mikinn mun á því að greina lið af myndbandsupptökum og að mæta því inni á vellinum.

„Við höfðum einungis séð þá á myndbandsupptökum og greint leiki. Það er aðeins öðruvísi að mæta þeim síðan augliti til auglitis. Þeir eru bara mjög góðir í því sem þeir gera. Þeir spila mjög beinskeyttan bolta og vinna seinni boltana. Við lærðum aðeins inn á það, löguðum aðeins til hjá okkur og mér fannst það ganga betur hjá okkur í dag,“ sagði Sölvi Geir.