Neuer: Bárum of mikla virðingu fyrir Man. Utd

Manuel Neuer, markvörður Schalke, var pirraður eftir tapið gegn Man. Utd í Meistaradeildinni en honum fannst sitt lið sýna Man. Utd allt of mikla virðingu í leiknum.

Sjálfur átti Neuer ótrúlegan stórleik og sá til þess að Schalke tapaði leiknum ekki stærra. Sir Alex Ferguson, stjóri Man. Utd, hrósaði Neuer í hástert eftir leikinn fyrir frammistöðuna.

"Það er gaman að fá hrós frá manni eins og Ferguson en við töpuðum og það fer verulega í taugarnar á mér. Við vorum ekki stressaðir heldur bárum við allt of mikla virðingu fyrir Man. Utd," sagði Neuer en hann telur sitt lið ekki hafa neinu að tapa í seinni leiknum.

"Fyrri hálfleikur mun segja mikið. Ef okkur tekst að vera 1-0 yfir þá er ýmislegt hægt. Þá gæti United farið að skjálfa."