Aðeins eitt ár frá síðasta bikarmeistaratitli KR-inga | Myndband

KR mætir Val í úrslitum Borgunarbikarsins á morgun en KR-ingar hafa átt góðu gengi að fagna í bikarúrslitunum undanfarin ár. KR fær tækifæri á að verja bikarmeistaratitilinn en Vesturbæjarliðið vann 2-1 sigur á Keflavík í fyrra.

Leikurinn var jafn í fyrri hálfleik, en í seinni hálfleik tóku KR-ingar yfir. Það var þó ekki fyrr en í uppbótartíma sem þeim tókst að skora sigurmarkið, en þar var að verki Kjartan Henry Finnbogason eftir sendingu frá Gary Martin.

Keflavík komst yfir eftir tæplega korter þegar Hörður Sveinsson nýtti sér varnarmistök KR-inga. Frans Elvarsson komst inn í sendingu Grétars Sigfinns Sigurðarssonar, renndi boltanum inn á Hörð sem lagði boltann framhjá Stefáni Loga Magnússyni í marki KR.

KR-ingar voru hins vegar ekki lengi að jafna metin. Óskar Örn tók hornspyrnu frá hægri, þar skallaði Gary boltann inn á markteiginn, á Grétar sem kom boltanum yfir línuna og jafnaði metin í 1-1.

Eftir jöfnunarmarkið náðu KR-ingar tökum á leiknum en gekk illa að skapa færi og tókst ekki að bæta við marki. Virtist leikurinn því ætla að fara í framlengingu þegar Kjartan Henry skoraði sigurmark KR í uppbótartíma seinni hálfleiks.

Gary fékk þá boltann hægra megin í vítateignum eftir fyrirgjöf Óskars Arnars og skaut honum fyrir markið á Kjartan Henry sem stóð nánast á línunni. Kjartan Henry hitti boltann ekkert sérstaklega vel, en yfir línuna fór hann og tryggði KR-ingum titilinn stuttu fyrir leikslok.

Aðeins tveimur mínútum síðar flautaði Garðar Örn Hinriksson, dómari leiksins, til leiksloka og KR-ingar gátu fagnað bikarmeistaratitlinum. Þeim fjórtánda í heildina og fjórða á síðustu sjö árum og síðasta titli Rúnars Kristinssonar sem þjálfari KR.