Vonast til að sam­komu­lag náist innan skamms, vonandi í dag

„Þau fleyttu okkur áfram í samtalinu og ég er bjartsýn á framhaldið,“ segir Þórunn aðspurð hvort fundahöldin hafi gengið vel í gær.

Það vekur athygli að á dagskrá þingfundar fyrir daginn í dag sem hefst klukkan tíu eru veiðigjöldin hvergi sjáanleg. Þórunn segir að lesa megi út úr því að vel hafi gengið í samræðunum í gærkvöldi. 

„Dagskrá þingfundar í dag ber þess merki að við vonumst til að ná lokasamkomulagi um þinglokin mjög bráðlega,“ segir Þórunn og bætir við að það væri gott ef það tækist í dag.

Hún vill þó ekki fara nánar út í hvað felst í því samkomulagi sem er í burðarliðnum eða hvernig fer fyrir hinu umdeilda veiðigjaldamáli. „Það er verið að vinna í því máli og það er auðvitað forsenda þess að við getum haldið áfram með þessa dagskrá eins og hún lítur út núna,“ segir Þórunn Sveinbjarnardóttir forseti Alþingis.