Upp­gjörið: ÍBV - KR 2-1 | Fyrir­liðinn tryggði fögnuð í Eyjum

ÍBV tók á móti KR og fagnaði dramatískum 2-1 sigri í Þjóðhátíðarleiknum í Vestmannaeyjum. Jafnt var alveg fram að lokamínútu venjulegs leiktíma en fyrirliði ÍBV sá til þess að þeir geti fagnað grimmt í Herjólfsdalnum í kvöld.

Vicente Valor skoraði mark ÍBV úr vítaspyrnu, gegn sínum gömlu félögum, eftir að Finnur Tómas braut á Sverri Páli í vítateignum.

Amin Cosic skoraði svo jöfnunarmark KR, sitt fyrsta fyrir félagið, eftir góðan undirbúning Arons Sigurðarsonar.

ÍBV var hættulegri aðilinn í seinni hálfleik og stöngin bjargaði KR í tvígang áður en Alex Freyr setti sigurmarkið á lokamínútu venjulegs leiktíma.

Eyjamenn fóru því með sigur af hólmi og munu eflaust fagna vel í Herjólfsdalnum í kvöld á meðan KR heldur heim í Herjólfi. 

ÍBV stekkur upp í sjöunda sætið með þessum sigri en pakkinn er þéttur í neðri hluta deildarinnar og stutt er í næsta lið fyrir ofan og neðan. KR situr áfram í ellefta, næstneðsta sæti deildarinnar.

Atvik leiksins

Dauðafærið sem Oliver Heiðarsson fékk á 76. mínútu var eitt af stærstu atvikum leiksins. Hann var kominn einn á móti Halldóri Snæ, markverði KR, en skotið hans fór framhjá markinu.

Stjörnur og skúrkar

Hermann Þór Ragnarsson og Oliver Heiðarsson fengu góð færi sem þeir hefðu mátt nýta betur.

Hetja ÍBV, Alex Freyr Hilmarsson tryggði sigurinn á lokamínútunni.

Halldór Snær, markvörður KR átti nokkrar glæsilegar vörslur og héldu KR inni í leiknum.

Stemning og umgjörð

Full stúka í vonskuveðri í Vestmannaeyjum en stemningin var virkilega góð og vel heyrðist í stuðningsmönnum.

Dómarar

Twana Khalid Ahmed var á flautunni, ekkert út á hann að setja í leiknum í dag.