Trump segir Hamas og Ísraela hafa náð sam­komu­lagi

Í færslu sem hann birti á Truth Social, hans eigin samfélagsmiðli, segir Trump að með þessu eigi að mynda sterkan og varandi frið. Komið verði fram við alla af sanngirni og þakkar hann erindrekum Katar, Egyptalands og Tyrklands fyrir aðkomu þeirra að því að samkomulag hafi náðst.

Viðræðurnar fóru fram í Egyptalandi.

Samkomulagið er meðal annars sagt fela í sér að Ísraelar sleppi palestínskum föngum úr þeirra haldi, hörfi með hermenn og opni aftur fyrir flæði neyðarhjálpar inn á Gasa.

Þetta segir embættismaður frá Katar og segir hann að samkomulagið eigi að leiða til endaloka hernaðar Ísraela á Gasa. Frekari upplýsingar um samkomulagið verði veittar síðar.

Í yfirlýsingu frá leiðtogum Hamas kalla þeir eftir því að Trump og aðrir ráðamenn í Mið-Austurlöndum og víðar, tryggi að Ísraelar framfylgi samkomulaginu. Að þeir tefji ekki framkvæmd þess eða fari ekki eftir því sem þeir hafi samþykkt.

Þeir segja enn fremur að fórnir Palestínumanna verði ekki til einskis.

Fjölmiðlar ytra segja að til standi að skrifa undir samkomulagið á morgun og að lifandi gíslum Hamas verði sleppt á laugardaginn eða á sunnudaginn.

Rétti Trump miða um yfirlýsingu

Marco Rubio, utanríkisráðherra Bandaríkjanna, gekk inn á fund sem Donald Trump, forseti, sat með íhaldssömum áhrifavöldum og blaðamönnum fyrr í kvöld og rétti forsetanum miða. Á mynd sem ljósmyndari náði af miðanum sést að Rubio var að biðja Trump um að gefa grænt ljós á færslu um samkomulag varðandi Gasaströndina væri í höfn.

Það þyrfti Trump að gera svo hann gæti verið fyrstur til að tilkynna að samkomulag hafði náðst og það á Truth Social, hans eigin samfélagsmiðli. Á miðanum stóð að samkomulag væri „mjög nærri“.

Í kjölfarið svaraði Trump nokkrum spurningum frá blaðamönnum meðan Rubio stóð óþreyjufullur nærri, samkvæmt AP fréttaveitunni. Þegar Trump stóð upp sagði hann að samkomulag væri nærri en neitaði að fara nánar út í það.

„Ég þarf að fara núna, til að reyna að leysa vandamál í Mið-Austurlöndum,“ sagði hann.

Viðræður milli leiðtoga Hamas og Ísraela hafa farið fram í Egyptalandi undanfarna daga. Þeim er ætlað að binda enda á hernað Ísraela þar og sagði Trump fyrr í kvöld að hann myndi mögulega fara þangað um helgina.

Trump lagði á dögunum fram tillögur að mögulegu friðarsamkomulagi sem samþykktar hafa verið af Ísraelum og nokkrum ríkjum Mið-Austurlanda.

Tillögur Trumps voru mjög loðnar þegar kom að mögulegri stofnun ríkis Palestínu og tveggja ríkja lausn. Þær fólu einnig í sér að Hamas-liðar yrðu að leggja niður vopn og að þeir mættu ekki koma að stjórn Gasastrandarinnar í framtíðinni.

Hvernig þetta mun líta út í samkomulaginu sem samþykkt var í kvöld á eftir að koma í ljós en hingað til hafa leiðtogar Hamas hafnað öllum kröfum um að leggja niður vopn.

Sjá einnig: Hótar hel­víti á jörð sam­þykki Hamas ekki til­lögurnar

Al Jazeera hefur eftir heimildarmanni sínum í Palestínu að leiðtogar Hamas hafi samþykkt að sleppa öllum gíslum sem eru í þeirra haldi, en ekki líkum sem þeir halda enn. Heimildarmaðurinn segir nokkurn árangur hafa náðst þegar kemur að skiptum á föngum og tryggingum um að Ísraelar hefji stríðið ekki aftur þegar gíslum hefur verið sleppt.

Gíslunum verður mögulega sleppt um helgina, samkvæmt heimildum blaðamanns Times of Israel.

Palestínskir miðlar birtu fyrr í kvöld myndir af sendinefnd Hamas taka í hendur erindreka frá Katar og Tyrklandi. Myndirnar munu hafa verið teknar í Egyptalandi í kvöld.

Fréttin hefur verið uppfærð og verður uppfærð frekar.