Olmert sýndur sem nasisti

Miryam Shomrat, sendiherra Ísraels á Noregi og Íslandi, hefur lagt fram kvörtun við Blaðamannafélag Noregs vegna skopmyndar sem birtist í norska blaðinu Dagbladet. Myndin sýndi forsætisráðherra Ísraels, Ehud Olmert, sem foringja í fangabúðum nasista í seinni heimsstyrjöldinni og vísaði til árása Ísraela á Palestínumenn á Gaza-svæðinu. Hún birtist hinn 10. júlí.

Sagði Shomrat að til greina kæmi að kæra birtingu myndarinnar og sagðist vænta afsökunarbeiðni. Ritstjóri Dagbladet segir skopmyndina vera innan marka tjáningarfrelsis.