Einn stofnenda Benetton allur

Gilberto Benetton, einn stofnenda ítalska fataframleiðandans Benetton, er látinn 77 ára að aldri.

Gilberto stofnaði fyrirtækið United Colors of Benetton á sjöunda áratugnum ásamt systur sinni Giuliana og bræðrum sínum Luciano og Carlo. Benetton-fjölskyldan er ein sú valdamesta á Ítalíu, en hún hefur einnig auðgast í byggingaiðnaði, samgöngum og veitingarekstri.

BBC  greinir frá því að Gilberto hafi verið helsti drifkrafturinn að fjölskyldufyrirtækið leitaði inn á nýja markaði, og hætti að einblína á fataframleiðslu. Veitingastaðirnir Autogrill og flugvellir Rómarborgar eru meðal þess sem er í eigu Benetton-fjölskyldunnar.

Fatamerkið Benetton var sérlega vinsælt á níunda og tíunda áratugnum, þar sem skærir litir réðu ríkjum. Auglýsingar fyrirtækisins hafa jafnan vakið mikla athygli og ögrað, en þar má nefna eina þar sem svört kona gaf hvítu barni brjóst. Þá hafa verið notaðar ljósmyndir af bandarískum föngum á dauðadeild í auglýsingum fyrirtækisins.